«Шиелідегі жағдай бәрімізге сабақ болуы тиіс»

 Жаһанды жайлаған індеттің қаупі жан-жақты түсіндіріліп, сақтану шаралары қарқынды жүргізіліп жатқанына қарамастан, жұмбақ дерт Сыр өңірінде де сындарлы күйде тұр. Наурыздың аяғына қарай бірлі-жарым бой көрсеткен вирус аз уақыттың ішінде белең алды. Бүгінде өңірде індет ілмегіне іліккендер саны күннен күнге көбейіп отыр. Соның ішінде Шиелі ауданынан 52 науқастың шығуы жағдайдың шын мәнінде күрделі екенін білдірсе керек.

Осы орайда облыс орталығы мен ауру көп тіркелген аудандарды карантинге алу жөнінде шешім қабылданды.  Қазір инфекцияның таралу қаупін төмендету үшін Қызылорда қаласы, Жаңақорған кенті және Шиелі ауданына қарасты Ш. Қодаманов ауылы карантиндік режимге көшті. Жаңа науқастардың тіркелуіне байланысты Балаби ауылы карантинге жабылды.

Осы орайда ахуалды білу мақсатында Шиелі ау­дандық ауруханасы бас дәрігерінің емдеу ісі жөніндегі орынбасары Бақтыгүл Мұса­ғалиевамен телефон арқы­лы байланысқа шықтық. Белгілі болғанындай, індет жұқтырған 52 адамның 42-сі Ш.Қодаманов ауылының тұрғыны. Карантинге жат­қызылғандардың 60 проценті де осы ауылдың азаматтары. Бүгінде науқастанғандардың 47-сі  облыстық жұқпалы аурулар ауруханасына тасы­мал­данып, ем алуда. Ал аудандық жұқпалы аурулар бөлімінде бес науқас жатыр. Оған қоса, провизорлық бө­лімде 7  күдікті, карантиндік бөлімде 184, үй жағдайында 143 адам бақылауда.

Шиелі аудандық ауру­ханасында ін­дет таралуының алдын алу бойынша бірқатар іс-шаралар қабылданды. Ауру­хананың ескі ғимаратынан 7 инфек­циялық, 15 провизорлық және 100 карантиндік орын дайын­далып, құрамында 6 қыз­меткер бар медициналық бекет жасақталды. Әр бекетке бір дәрігер, екі мейірбике, екі тазалықшы. Індеттің аудан ішінде тез таралып, жағдайдың күрделенуіне байланысты ау­дан әкімдігінің қолдауымен карантиндік орындар 200-ге дейін көбейтілді. Қажеттілікке байланысты аудандық агро­колледж ғимараты қосым­ша пайдалануға берілді. Медициналық көмек көр­сететін 60 қызметкер арнайы бұйрықпен бекітілген ке­зек­шілік кестесі бойынша жұмыс істеуде. Олардың арасында екі инфекционист, екі эпидемиолог, бірнеше жалпы тәжірибелік дәрігер бар, – деді Бақтыгүл Сағидоллақызы.

Сондай-ақ, ол барлық мамандар бірреттік киім­дер­мен, қорғаныш құралдарымен қамтамасыз етілгенін айтты. Ауданда жол қозғалысын ба­қылайтын 6 бекет ашылып, медициналық қызметкерлер, жүргізушілер үш ауысымда тәулік бойы жұмыс істеуде.  Теміржол вокзалында да бекет ашылып, онда медицина мамандары екі ауысымда еңбек етуде.

Қалыптасқан эпидахуалға байланысты ауданның бас мем­лекеттік санитарлық дә­рігері Кенжебек Әбішевке хабар­ласқан едік. Ауданда жұмыс барысымен жүрген облыстың мемлекеттік бас санитарлық дәрігері Әлия Әбдіқайымованың өзі бай­ла­нысқа шықты.  Бас са­ни­тарлық дәрігердің ай­туын­ша, ауданға қарасты Ш.Қодаманов елді мекенінде топтасқан жағдай тіркеліп отыр. Анығын айтқанда, 23 наурызда Нұр-Сұлтан қала­сынан келген қыз бала 25 наурызда құрбыларымен басқосу жасайды. 27 наурыз күні келесі басқосу ұйым­дастырылады. Осылайша үй ішіндегі бес адамнан бөлек басқосуға жиналған 30-дан аса жанмен қарым-қатынас орна­тады. Осының негізінде вирус тізбектеліп жалғаса берген.

– Бүгінде елді мекен то­лықтай карантинге жа­был­ды. Залалсыздандыру жұмыс­тары жүргізілуде. Ол үшін Тараз қаласының 21/356 әс­кери шекара бөлімінен жауын­гер­лер көмекке келіп, жұ­­мылдырылды. Одан бас­қа, орман шаруашылығы қыз­мет­­керлері де авто­көлік­тері­­мен шашырату арқылы за­­лалсыздандыру жұмыс­та­рын жүргізді. Сондай-ақ,  Жаңа­­­қорған аудандық  ұлт­тық сараптама орталығы ау­дан­­дық бөлімшесінің ма­ман­­дары да көмекке келіп, ін­дет ошақтарын за­лал­сыз­дан­дырды, – деді Ә.Әбдіқайымова.

«Жұмыла көтерген жүк жеңіл» демекші, қиын күн­дерде бір-бірімізге қолғабыс беріп, көмек көрсету ләзім. Әлия Мү­тәліпқызының айтуын­ша, ауданға Арал теңізі обаға қарсы күрес стан­­циясынан жылжы­малы автолаборатория шақыр­ты­лып, қондырғы ор­натылды. Бұл – зерттеуді аз уақыт ішінде жүргізіп, ауруды ерте анықтау мақсатында  жасалып отырған оңды қадам. Ол үшін Алматы қаласындағы Айқынбаев атын­дағы Қазақ зооноздық және карантиндік жұқпалы ауру­лар жөніндегі ғылыми инс­ти­тутынан арнайы маман шақыртылған. 

Айтып өткеніміздей, анық­талған науқастар негізінен облыстық жұқпалы аурулар ауруханасына тасымалдануда. Әйтсе де, аудан дәрігерлері облыстық жұқпалы аурулар ауруханасы мамандарымен телемедицина арқылы байла­нысып, қажет кезде кеңес алуда.

Бүгінде Ш.Қодаманов ауы­лы қатаң карантинде. Ауыл­ға ешкім кіріп-шыға ал­майды. Азық-түлік, дәрі-дәрмек секілді қажетті дүние­лер блок-бекетке әкелініп, сол жерден ауылға қарай арнайы адам алып кіргізеді.

– Осындай шаралар арқылы індеттің жұғу тізбегін үзуді ойлап отырмыз. Тәжірибеден көріп отырғандай, бір адамның карантиндік талапқа бейқам қарауы бүкіл отбасының, дос-жаранның, ауылдың індетке шалдығуына себепкер болып отыр. Шиелі ауданында орын алған бұл ахуал әрқайсымызға сабақ болуы тиіс. Тұрғындардан карантин тәртібіне бағынып, өзін және өзгелерді қауіпті вирустан қорғауды сұраймыз, –  деді облыстың бас санитарлық дәрігері.

Айнұр Батталова,

«Сыр бойы».

НЕГІЗГІ ЖАҢАЛЫҚТАР 13 сәуір 2020 г. 447 0