Сыр бойы

«Құрманбай ата» шаруа қожалығы Жалағаш ауданының Т.Жүргенов ауылында орналасқан. Шаруашылық облыста бірінші болып немістің Lemken компаниясының нөлдік технологияға негізделген тұқым сепкішін пайдалана бастады. Оның тиімділігін мамандар жоғары бағалап отыр.

– Бір мезетте екі-үш операцияны қатар, дән себу нормасын дәлме-дәл орындайды. Нәтижесінде егін бітік шығады. Қанша дән себілсе, соншасы өседі. Ысырап болмайды, – дейді шаруашылық басшысы Еркін Бекжанов.

Арнайы техника бір күнде 30 гектар жерге тұқым себуге қауқарлы. Қожалық диқандары 370 гектарға жоңышқа егу жұмысын күріш егу басталғанға дейін, бас-аяғы он шақты күнде бітіруді көздеп отыр. 

Елдегі күрделенген жағдайға байланысты жарияланған ка­ран­­­тин кезінде көктемгі қа­уырт қимылға ештеңе кедергі кел­тірмеуі тиіс. Осыны ескерген еңбеккерлер дала төсінде қызу тірлікпен айналысып жүр. Жыл­­дағы қарқынмен биыл да тәуір көрсеткішпен шығу ойда бар. Айталық, былтыр диқандар гектарына 75,5 центнерден Сыр салысын жинады. Жерді лазерь­лік агрегатпен тегістеп, қажетті тыңайтқышпен өңдеу сапалы өнімге қол жеткізуге мүмкіндік береді. Су тапшылығына қатыс­ты болжамды қаперге алған қо­­жа­лық күріштің орнына жоңыш­­қа, дәндік жүгері мен мал азы­ғы түріндегі дақыл кө­лемін көбейтуге ықыласты. 

Өңір бойынша биылғы егістік көлемі 183,1 мың гектар жерге жоспарланса, соның 88,2 мың гектары – күріш. Облыстық ауыл шаруашылығы басқармасының мәліметінше, ол сәуірдің 20-нан кейін егіле бастайды. Ал әзірге 21,2 мың гектар аумаққа бидай, арпа, мақсары, жоңышқа орналастырылды. Минералды тыңайтқыш, тұқымдық матер­иал қоры жет­кілікті. Көк­тем­гі дала жұ­мыстары үшін дизель оты­нының бағасын нарық­тағы­дан 15 процентке арзандату тура­лы Президент тапсырмасы шаруа­­шылықтар үшін демеу бол­ғалы тұр. Есеп­теуге қара­ғанда сәуір-мамыр ай­ла­ры­на бө­лін­ген 10750 тонна сұйық отын литріне 162 тең­геге дейін арзан­да­уы тиіс. Сөй­тіп, жергілікті ша­руа­­шылық құры­лымдары осы­­ның есебінен орташа есеппен 170 млн теңгеге дейін үнемдемек.

Назерке САНИЯЗОВА,

«Сыр бойы».