Сыр бойы

Дүниежүзін жайлаған ко­ронавирус инфекция­сымен кү­ресте, ең алдымен, ақ ха­латты абзал жандарға үлкен күш түсіп, сенім артылып отырғаны белгілі. Мылтықсыз майданның алдыңғы шебінде жүрген дәрігерлер қауымына деген жауапкершілік жүгі ауруға шалдыққандар саны артқан сайын еселеп ауырлай берді. 

Жай күннің өзінде тұр­ғындар саулығы жолында қарбалас тірлік кешетін  олар бүгінде тіпті күрделі жағдайда еңбек етуде. Өйткені бар үміт – дәрігерлерде. Осы орайда антына адал ақ халаттылар да уақытпен санаспай, үй бетін көрмей науқастарды аман алып қалу жолында жүр. Індет шарпыған елдердің барлығында, біздің елімізде де солай. Өңірімізде де ауру анықталған алғашқы күннен бері эпидемиолог, инфекционист мамандарымыз аяғынан тік тұрып қызмет етуде.

Қазір Жаңақорған ауданы дәрігер­лерінің жұмысы да қауырт. Жағдайды білу мақ­сатында  Жаңа­қорған ау­дан­­аралық ауруха­насының жо­­ғары санатты аға дәрігер-эпиде­мио­логы Асқан  Отар­бековпен телефон арқылы байланысқан едік.

Бүгінде Жаңақорған ауданында 16 жағдай тіркелді. Қалыптасқан жағдайға бай­ланысты  медицина мамандары күшейтілген жұмыс режиміне көшкен.

– Ауру шыққан бойда дәрі­­гер­лер тұрғындарға сақ­тық шараларын айтып, қа­уіпті індет жөнінде қажетті ақпараттарды берді. Нау­қаспен қаты­наста болғандарды мер­зі­мінде оқшау­лау шара­ларына жұмыл­ды­рыл­ған жал­­пы тәжірибелік аймақ дәрі­герлері барын салып уақыт­пен санас­пай жұмыс істеуде. Кесел бақылауға  алынған азаматтар іші­нен шықты. Бұл – дер кезінде қабыл­­данған шаралар  мен тынымсыз атқарылған жұмыс­тардың, яғни дәрі­герлер мен мейірбикелердің бала-шағасын тастап күндіз-түні дамыл таппай зыр жүгіріп үй аралап жүргендігінің нәтижесі. Сондықтан денсаулық сақтау саласы қызметкерлерінің қа­уіпті індетті анықтау, оның алдын алу барысында жасап жатқан еңбегі ұшан-теңіз, – деді ол.

Асқан Бердіұлының айт­уынша, аудандық инфекциялық бөлімінде  25 қызметкер бар. Соның 10-ға жуығы қазіргі кезде науқастардың айығып кетуі үшін тынбай еңбек етуде.

– Бекітілген тәртіп бо­йын­ша медицина маманы науқас қашан айығып кеткенше үйіне жіберілмейді. Оларға нау­қастар жатқан ғимарат ішінен шығуға рұқсат жоқ.  Маман­да­рымыздың барлығы арнайы кос­тюммен қамтылған. Десе де, тәртіпке бағынуымыз қажет. Соңғы науқас жазылып шыққан соң ғана дәрігер үйіне бара алады. Бүгінде біздің мамандарымыз осы тәртіпке бағынып, жұмыстарын ат­қаруда. Менің өзім ауру анықталған алғашқы күннен бастап, яғни, 29 наурыздан бері үйіме барған жоқпын. Отбасыммен тек телефон арқылы ғана сөйлесемін. Мұның себебі де түсінікті болар, өйткені науқастардың жағдайының күрт тө­мен­деп кетпеуіне, олардың дертінен айығып үйлеріне аман-есен оралуларына біз жауаптымыз, – дейді ол.

37 жылдық дәрігерлік ең­бек жолында бірқатар қиын­дықтармен бетпе-бет келген дәрігер  бұл жолғы індеттің қаупі  бөлек екенін айтады.

– 1986 жылдары жас ма­ман болып еңбекке аралас­қанымда іш сүзегі, сары­ауру секілді сырқат түрлері көптеп кездескені есімде. Сондай-ақ, біздің ау­дан ауыл ­шар­уашылығы, әсі­ресе, мал шаруашылығымен айналысатын аймақ болған­дықтан, кенеден келетін кесел – Қырым қанды безгегі де жиі көрініп тұратыны бар.  Сондай аурулар шыққан кезде де күшейтілген жұмыс режиміне көшетінбіз. Бірақ мына індет әлем бойынша ерекше жағдайда тарағандықтан, бұған аса сақ болуымыз қажет.  Осы орайда тұрғындардан бір ғана өтінішіміз бар – егер аурудың таралуы ертерек тоқтасын десек, үйден шықпай, тәртіпке бағынайық! Әрбір науқастың өмірі үшін күн-түн демей, аяқтарынан тік тұрып, үй-жайларын көрмей жұмыс істеп жатқан дәрігерлерге солай ғана көмектесе алатынымызды естен шығармасақ екен, – дейді дәрігер.

Айта кету керек, бүгінде ем алып жатқан науқастардың жағдайы қалыпты, асқынулар болып жатқан жоқ. Кесте бойынша дәрігерлер, орта буын медицина қызметкерлері жұмыс­тарын атқаруда.

Осы орайда облыс тұрғын­дарынан қалыптасқан жағдайға байланысты енгізілген карантин шараларына  үлкен жауапкершілікпен қарап, тәр­тіпке бағынуларын біз де өтініп сұраймыз. Әр науқастың өмірі үшін күресіп жүрген бүгінгі күннің қаһармандары – ақ халатты абзал жандарға осылай қолдау білдірейік, ағайын!

Айнұр БАТТАЛОВА,

«Сыр бойы».