Сыр бойы

Қызылорда облысы құрылыс қарқыны жөнінен республикада алдыңғы қатарда келеді. Ал аймақтағы аудандар ішінде Шиеліде де өнімді еңбек бар. Былтыр республикалық және облыстық бюджеттен 227 млн теңге бөлініп, аудан орталығынан 18 пәтерлі көпқабатты тұрғын үй құрылысының жұмыстары басталды.  Биыл сол үйлер пайдалануға беріледі деп күтілуде.

Мемлекеттік «Нұрлы Жер» бағдарламасы аясында салынып жатқан жаңа құрылыс нысандары Шиелі кентінің «Көкшоқы» шағын ауданында орналасқан. Жаздың алғашқы айында пайдалануға беріледі деп жоспарланған үйлердің құрылыс-монтаж жұмыстарын бас мердігер «СМП-Қызыл­орда» ЖШС жүргізуде. 

Сонымен қатар республикадан тағы дәл осындай 4 тұрғын үйдің құрылысын бастауға 65 млн теңге қаржы бөлу мәселесі қолдау тапқан. Одан бөлек, аудан орталығындағы «Береке» және «Ақорда» шағын ау­данынан салынатын, жалпы құны 1 млрд теңге болатын  3 бөл­мелі 59 тұрғын үйдің жоба-сметалық құжаттары әзірленіп, республикалық және облыстық бюджеттік өтінімдер тапсырылыпты.

Осыдан төрт жыл бұрын «Өңірлерді дамыту-2020» бағ­дар­ламасы аясында  қаржы қа­ралып, кент аумағындағы «Береке», «Бәйтерек», «Ақорда», «Шұ­ғыла»  шағын аудандары және Алғабас, Ш.Қодаманов, Н.Бекежанов, Ы.Жақаев, Би­дай­көл елді мекендеріндегі салы­натын тұрғын үйлерге 280 ша­қы­рымнан астам инфра­құры­­лым желілері жүргізіліпті. Инфра­құрылым тартылған ау­мақ­тағы 2278 жер телімі кезекте тұрған аудан тұрғындарына берілген.

Аудандық құрылыс, сәу­лет және қала құрылысы бөлі­мінің мәліметіне сүйенсек, тұр­­ғын­дарға жер телімін беру­де қарқынды жұмыс бар. 2018-2019 жылдары «Нұрлы жер» бағдарламасы негізінде орта­лықтағы «Шұғыла-2», «Шұғы­ла-3», «Шығыс-4» ша­ғын аудан­да­рына су және электр жүйесі тартылып, инфра­құрылым желілері жүргізіл­ген. Аталған аудандарда 356 жер телімі кезекте тұрған тұр­ғын­дарға берілсе, биыл 610 жер телімі тағы табысталатын көрінеді.

Шиелідегі сүйіншілейтін маңызды жаңалықтың бірі – темір жол үстінен өтетін автомобиль көпірінің құрылысы. Биыл тұрғындар тарапынан атал^­ған көпірді  салу жө­нін­дегі өтініштері орындалатын сыңайлы. Жалпы құны 645 млн теңгеге жуықтайтын көпір құрылысының жобасына облыстық бюджеттен қар­жы бөлініп, қазіргі таңда мем­ле­кеттік сатып алу конкурсы өткізілуде дейді мамандар.

Ержан ҚОЖАСОВ.