Жаңа номер

Сыр бойы

syrboyi@yandex.kz

+7 (7242) 40-02-17

Қазалының даму қарқыны жоғары

Әр жылдың өзіндік ерекшелігі, жаңалығы болатыны белгілі. Өткен жыл Қазалы жұртшылығының да есінде елеулі оқиғалармен қалды. Қазалы ауданының әкімі Мұрат Ергешбаев былтыр атқарылған жұмыстар жөнінде халық алдында есеп берді. Кездесуге облыс әкімінің орынбасары Мұрат Имандосов, басқарма басшылары, аудан тұрғындары қатысты.

Аудан тұрғындары үшін «Әлсейіт» көпірінің ел игілігіне берілуі ұзақ жылдар бойы өткел бейнетін тартқан сергелдеңнен құтқарды. Қалқымалы көпір көктемгі-күзгі сең жүру, су тасқыны кезінде уақытша алынып тасталатын. Мұндайда жолаушылар аудан орталығына жету үшін дария бойын жағалап бір бүйірдегі Басықара елді мекені арқылы айналып жүруге мәжбүр болушы еді. Енді бұл мәселенің түйіні шешілді.

Тұрғындарды баспанамен қамтамасыз етуде де ілгерілеушілік бар. «Нұрлы жер» бағдарламасы аясында салынған көпқабатты тұрғын үйлердің пайдалануға берілуі сөзіміздің дәлелі. Бұл үйлер негізінен ата-анасының қамқорлығынсыз қалған балалар, әлеуметтік осал топтар және көпбалалы отбасыларға берілді.

Әйтеке би кенті мен Қазалы қаласының аралығынан мекемелер үйінің зәулім ғимараты бой көтерді. Бұл ғимаратта аудан әкімдігі, аудандық мәслихатқа қоса 9 бөлім орналасқан. Бүгінгі таңда аудан әкімдігінде «Ашық әкімдік» жобасы жүзеге асырылуда. «Open Space» жобасы аясында әртүрлі мекемелердің қызметкерлері халыққа бір жерден қызмет көрсетіп жатыр. Құжат тапсыратын тұрғындар бір жерден кеңес алып, жұмыстары жеңілдеді. Аудандық маңыздағы жолдарды жөндеудегі ілкімді істер бар.

Бозкөл мен Кәукей ауылдары аралығындағы жолға күрделі жөндеу жүргізілуде. Осы жұмыстарды жалғастыру үшін биылға қосымша қаржы қаралып отыр. Толық аяқтау үшін әлі де қаржы қажет. Сонымен қатар, 2018 жылы Қазалы қаласынан «Қарлаңға» және «Қарлаңнан» Қожабақы ауылына дейін, Қожабақы ауылынан Ү.Түктібаев ауылына дейінгі жолдарға орташа жөндеу жұмыстары басталған болатын. Биыл осы жұмыстарды толық аяқтауға облыстық бюджеттен қаржы бөлінді.
– Дәл осындай жұмыстар Басықара ауылынан Абай ауылына дейінгі жолға да жүргізілген еді. Осы жолды аяқтау үшін біршама қаржы қажет. Сондықтан, жыл аяғына дейін «Кәукейдің» және Абай ауылының жолдарын аяқтауға жұмыс жасаймыз, – деді аудан әкімі.
Биыл аудан орталығынан ауысымына 250 адам қабылдайтын аудандық емхана Әйтеке би кенті мен Қазалы қаласының аралығындағы 4 жолақты жол құрылысы басталады.
Есепті кездесуде облыс әкімінің орынбасары Мұрат Имандосов Қазалы ауданы барлық көрсеткіш бойынша аймақтағы үздіктердің қатарынан көрінгенін, оған барша тұрғындардың қосқан үлесі зор екенін атап өтті. Облыс бойынша педагог қызметкерлердің біліктілігін арттыру институтының кафедра меңгерушісі, философия ғылымдарының докторы, облыстық қоғамдық кеңес мүшесі Баймырза Қожамберлиев ауданда атқарылған ауқымды жұмыстарға ризашылық білдірді.
Кездесуге қатысушылар қойған сауалдарға жауап беріліп, аудан тұрғындары әкімнің есебін, өткен жылы атқарылған жұмыстарды оң бағалады.

Жұмабек ТАБЫНБАЕВ.

НЕГІЗГІ ЖАҢАЛЫҚТАР 02 ақпан 2020 г. 889 0