Сыр бойы

 Апта соңында облыс әкімі Қуанышбек Ысқақов жұмыс сапарымен Қармақшы ауданында болды.  Барлық ауылдық округтерді аралап, Төретам кенті мен Ақай елді мекенінің жағдайымен танысты.

Алдымен Т.Көмекбаев ауыл­дық округіндегі №185 орта мектепте өткен кездесуде ауыл тұрғындары клуб үйін жаңарту және аурухана ғи­мара­тын күрделі жөндеу ту­ралы өтініштерін жеткізді. Аймақ басшысы бұл мәселе бо­йынша мемлекеттік-жеке­ше­лік әріптестік аясында жеке инвестор табуға мүмкіндік барын айтып, аудан басшысы Мұса Қалдарбеков пен ауыл­дық округ әкімі Ғалымжан Ақжігітовке нақты тапсырмалар жүктеді.

– Мұндай құрылыстарды бюджет есебінен салатын бол­сақ, көп уақыт кететіні анық. Жоба-сметалық құжаттарын дайындаудан бөлек, тендер өткізу жұмыстары және т.б. шаруалар созылып кетеді. Мемлекеттік-жекеменшік әріптестік бағ­дар­ламасының тиімділігі дәлелденген. Ауыл әкімдері инвестор тауып, мүмкіндіктерді қарастырғаны дұрыс, – деді аймақ басшысы.

Облыс әкімі осы ауылдағы мектеп оқушыларымен кездесті. Бітіруші түлектерге мамандық таңдауға қатысты ақыл-кеңесін айтты.

Мұнан соң аймақ басшысы Қуаңдария ауылында болды. Т.Көмекбаев ауылы да, Қуаңдария елді мекені тұр­ғындары да күріш екпейді. Сон­дықтан ауыл халқы мемлекет ұсынған бағдарламалар не­гізінде мал шаруашылығымен айналысуға ден қойған.

– Біз Өзбекстанмен ше­каралық аймақтамыз. Бүгін­де аудан орталығынан бері қарай жол жақсарды. Мал өсіріп, атакәсіпті жаңғыртып жа­тырмыз. Ауыл жастары белсенді. Әсіресе, Наурыз мейра­мына жыл сайын елдің әр қиырында еңбек етіп жүрген ұл-қыздарымыз жиналып, туған жерді көркейтуге үлес қосады. Ауызсу да, аяқсу да келіп тұр.  Келешектің жақсы болатынына сенім мол, – дейді Қуаңдария ауылының тұрғыны Ешпан Дүйсебаев.

Мұнан соң аймақ бас­шысы Алдашбай ахун, Тұр­мағамбет, Ақжар, Ақтөбе, ІІІ Интернационал, Жаңажол, Иіркөл, Төребай би ауыл­дарын­да болып, тұрғындар өтінішін тыңдады.

Алдашбай ахун ауылдық округінде өткен кездесуде жергілікті халық бірнеше мәселе көтерді. Солардың бірі – ауыл маңындағы «Шәймерден» су каналын тазалауға қаржы бөлу. Егіншілікпен айналысатын тұр­ғындар «ауыл маңындағы осы арық тазаланып, су тартылса» деген өтініш білдірді. 

Аймақ басшысы айтылған ұсыныстардың барлығы аяқсыз қалмайтынын жеткізді. Жауапты басқарма басшыларына тапсырма жүктеп, жұртшылық ұсынысына қатысты жұмыс істеуге нұсқау берді.

– 2012 жылы Алдашбай ахун ауылындағы ұзындығы 4,5 ша­қырым болатын «Шәймерден» ка­налы 8,1 млн теңге қаржыға тазаланған. Біз бұған электрлі немесе дизельді моторды биылдан қалдырмай орнатуды жоспарлап отырмыз, – дейді облыстық та­биғи ресурстар және табиғат пайда­лануды реттеу басқармасы басшысының орынбасары Бауыржан Оспанов.

Аяқсу мәселесі Төребай би ауылында да қозғалды. Су айдайтын электрлі насос қондырғысы биыл сатып алынбақ. Құны 8,1 млн болатын жобаны қаржыландыруға бюджеттік өтінім берілген.

Ал Иіркөл елді мекенінің халқы ұялы байланыс пен ішкі көшелерді жөндеуге көмек сұрайды. Аталған мәселелерді шешуді аудан әкімі М.Қалдарбеков өз жауапкершілігіне алып, ұсы­ныс-өтініштердің орындалуын жеделдететінін жеткізді.

– Мемлекет басшысының та­ла­бы – біріншіден, халықтың ауызбір­лігі. Екіншіден, қала мен ауыл ара­сындағы айырмашылықтың арасын қысқарту. Ауылдардың әлеуетін көтеру бірінші орында тұруы тиіс. Бұл сапа­рымыздың мақсаты – ел-елді аралап, сіздердің жағдайларыңызды көзбен көру. Көріп қана қоймай, кемшілік пен жетіспеушіліктің себебін анықтап, айтылған мәсе­лелер бойынша жұмыс жүргізу, – деді аймақ басшысы аудан тұрғындарымен кездесуде.

Сонымен қатар облыс әкімі Ақай ауылы, Төретам кенті, Қармақшы ауылдық округтерінде болып, тұрғындар көтерген мәсе­лелерді мұқият тыңдады, жауапты тұлғаларға тапсырма берді. Ақайлықтар газға қосылу мәселесін қозғады. Бүгінде Байқоңыр қаласы “көгілдір отын” тұтынып отыр. Іргесіндегі Ақай мен Төретам елді мекендерін газдандыру үшін тиісті жұмыстар атқарылуда.

Аймақта күріш өсіруде алдыңғы орында келе жатқан Жаңа­жол, Тұрмағанбет, ІІІ Интер­национал, Ақжар сияқты ауылдардағы шаруа­шылықтар жетістігін өзге ауыл­дарға үлгі етіп, ризашылығын жет­кізді. Айта кету керек, бұған дейін облыстағы тіректі елді мекендер байқауында Қармақшы ауданының ІІІ Интернационал ауылы жеңімпаз атанып, 10 млн теңге сыйақы алған болатын. Ал биыл 90 жылдығын тойлағалы отырған «Жаңажол» ЖШС күріш өнімділігін арттыруда үздіктер сапында.

– 1930 жылы майда кол­хоздардың бірігуімен жасақталған шаруашылықтың құрылғанына биыл 90 жыл толды. Сонау 1990 жылы сол кездегі төраға Болатбек Сүлейменовтің ұйытқы болуымен 60 жылдығын атап өткенбіз. Ірі шаралар ұйымдастырылып, шаруашылық үздіктері марапат­талған. Осы ауылдың алға басуына, көп жұрттан көш ілгері болуына бірден-бір үлес қосып отырған «Жаңажол» серіктестігі. Диқандар егіс көлемін арттырып, жылдағы дәстүрмен қырманды толтырмақ, – дейді Дүр Оңғар ауылының ақсақалы Серікбай Айманов.

Киелі Қорқыт ата жеріндегі ауыл­дарды аралап, ауданда мем­лекеттік бағдарламалардың орын­далуын назарға алып, халықтың ахуалымен жақын танысқан Қуанышбек Ысқақов тұрғындар көтерген барлық мәселе жіті бақылауда болатынын жеткізді.

Ержан ҚОЖАСОВ.

Қызылорда-Қармақшы-Қызылорда.