Сыр бойы

Энергетиктер күніне орай өткен салтанатты шарада облыс әкімінің орынбасары Марат Делмұханов сала мамандарын құттықтады. Қызметте абырой биігінен көрінген бірқатар азамат марапат мінберіне көтерілді. 

– Биыл аймақ көлемінде 500 шақырымнан аса электр желісі жаңартылып, 140-тан астам қосалқы станса орнатылды. Бұл өз кезегінде халыққа қызметтің сапасын арттыруға зор септігін тигізеді. Осы жылы саланы дамытуға 45 млрд теңге бөлінген. Биыл атқарылған істің ауқымы зор. Екі бірдей күн электр станциясын іске қостық. Олардың әрқайсысы күннен сағатына 80 мегаВатт қуат алады, – деді М.Делмұханов.

Жиында 50-ге жуық сала қыз­мет­кері марапатталды. Оның ішінде «Қы­зылорда электр тарату тораптары компаниясы» АҚ қалалық электр тора­бының басшысы Дінмұхамед Абдреев те бар. 

– Осы салада жұмыс істегеніме 30 жылдан асты. Бүгін ТМД бойынша «Еңбегі сіңген энергетик» төсбелгісін табыстады. Еңбектің еленгеніне қуа­ныштымын, – дейді ол.