Сыр бойы

Облыс әкімдігінің баспасөз орталығында өткен брифингте Жалағаш ауданының әкімі Қайратбек Сәрсенбаев ҚР Президенті Жолдауынан туындаған міндеттер мен алдағы жоспарларды, ауданның әлеуметтік-экономикалық даму қорытындыларымен таныстырды.

Аудан әкімінің айтуынша, биылғы 10 айда ауданның әлеу­меттік-экономикалық даму қар­қыны жоғары.

– Өнеркәсіп өнімдерін өн­діруші мекемелер мен кә­сіп­орындар, жеке сектор 4054,3 млн теңгенің өнімін өндірді. Бұл өткен жылдың осы ке­зеңімен салыстырғанда 12,5 процентке артық. Өнеркәсіп өнімдеріне талдау жасағанда, өңдеу өнеркәсібінің 109,3 процентке артқаны байқалады. Ал аудан бюджетінің көлемі бү­гінгі күнге 12,2 млрд теңгеге жетті, – деді Қайратбек Әу­бәкірұлы.

Аудан ауыл шаруашылығы саласы бойынша жыл сайын мол табысқа қол жеткізіп, өңір қазынасының ұлғаюына үлес қосып келеді. Биыл 36665 гектар жерге ауыл шаруашылығы дақылдары егіліп, былтырмен салыстырғанда 2,2 процентке артқан.

– Биыл диқандар ерен ең­бектің үлгісін көрсетіп 21800 гектар күріштің әр гектарынан 63 центнер өнім жинады. Сонымен бірге, 6090 тонна картоп, 18373 тонна көкөніс, 26268 тонна бақша өнімін алды. Ауыл ша­руашылығын дамыту мақ­са­тын­да 41 техника сатып алынды. Осындай тынымсыз тірліктің нәтижесінде биыл облыс көлемінде агроөнеркәсіп кешенін дамыту бағытында жо­ғары көрсеткішке жеткен ауданымыз «Алтын дән» ме­рекесінде бірінші орынды ие­ленді, – деді аудан әкімі.

Сондай-ақ, аудан әкімі шаруалардың мал басын арттыруда мемлекет ұсынған бағ­дарламаларды тиімді пайда­ла­нып, нәтижесінде мал ша­­­руа­­шылығы саласында төрт түлік басы өскенін айт­ты. Мә­селен, былтыр осы кезең­­мен салыстырғанда ірі қара 2 процентке, жылқы 7,8, түйе 1,1, үй құстары 15,9 процентке артса, қой-ешкі 96,8 про­центті құрап отыр.

Мал ша­руашылығымен айналысатын 88 шаруашылық бар. Таң ауылында «Агролидер Таң» ЖШС ет өнімдерін қайта өңдеу цехын ашқан. Цех тәулігіне 800 кг, жылына 120 мың тонна ет өнімдерін өңдейді. Жалпы ауданда ет өндіру 102,3 процентке, сүт өндіру 101 процентке, жұмыртқа өндіру 102,2 процентке орындалған. Мұнан бөлек, биыл 128 бас тоқты Иран рес­публикасына экспортталған.

Ақ­су ауылдық округінде «Қия­сов Еркебұлан» ЖК Ресей­ден 100 бас асыл­тұқымды қал­мақ сиырын әке­ліп, кәсібін дөң­гелетуде.

ҚР Ұлттық экономика ми­нистр­лігінің бұйрығына сәйкес облыс бойынша іріктелген ті­ректі және спутниктік елді мекендер тізіміне ауданнан 8 елді мекен енгізілген. Осыған орай, «Ауыл – ел бесігі» арнайы жобасына келер жылға Жалағаш кенті, Ақсу және Аққұм ауылдары бойынша республикалық бюджеттен қаржыландыруға 1889,7 млн теңгенің 11 жобасы ұсынылған.

Ауданда білім беру, денсау­лық сақтау салаларына аса кө­ңіл бөлінген. Өткен оқу жы­лында 287 оқушы 11 сынып­ты аяқтаса, 226-сы ҰБТ-ға қа­тыс­қан. Орташа балл 85,6-ны құраған. Мектеп бітірушілердің барлығы жоғары және арнаулы орта оқу орындарына түскен.

Былтырдан бастап барлық емханалар мен ауруханалар қағазсыз, яғни, цифрлы жүйе­ге көшіріліп, жұмыс жасауда. Ауданның емдеу меке­ме­лерінде 92 дәрігер, 463 орта буын медицина қызметкері жұ­мыс істейді. Есепті мерзімде 623 бала дүниеге келген. Соңғы 10 жылда ана өлімі тіркелмеген.

Тұрғын үй, құрылыс, газ­дандыру бағытында да ау­қым­ды жұмыстар көп.