Сыр бойы

Бүгін облыс әкімі Қ.Ысқақовтың қатысуымен А.Тоқмағанбетов атындағы қалалық мәдениет үйінде  халықаралық мүгедектер күніне арналған «Армансыз күнім болмайды» атты салтанатты шара ұйымдастырылды.

Қазіргі таңда өңірімізде 30 мыңнан астам мүмкіндігі шектеулі жандар тұрады. Бұл халықтың 3,7 пайызын құрайды. Оның 4 мыңы балалардың үлесінде. Бүгінде ерекше қажеттілігі бар жандарға әзірленген жеке оңалту бағдарламаларының орындалуына бюджеттен бөлінетін қаржы көлемі жылдан жылға артуда. Аймақта  оңалтудың жеке бағдарламалары 82,6%  орындалған ал,  республикада бұл көрсеткіш 59%  құрап отыр.

Аймақ басшысы мүмкіндігі шектеулі жандар арасында жыл бойы ұйымдастырылған шаралардың жеңімпаздарын марапаттады.

"Қазақстанда мүмкіндігі шектеулі  жандардың өмір сүру сапасын жақсарту және құқықтарын қамтамасыз ету жөніндегі 2025 жылға дейінгі Ұлттық жоспар бекітілді. Ұлттық жоспар аясында 2020 жылдан бастап техникалық құралдармен және оңалту қызметтерімен қамтамасыз етуді жақсартуға және оларды алу мерзімін қысқартуға, мүгедектігі бар адамдардың жеке қажеттіліктерін ескере отырып өз бетінше таңдау мүмкіндігін беретін Әлеуметтік қызметтер Порталы енгізіледі",- деді облыс әкімі Қ. Ысқақов.

Сондай-ақ, шарада ерекше жандар "Белсенді спортшы", "Белсенді орындаушы", "Белсенді көркем сөз шебері", "Белсенді қол-өнер шебері", "Үздік үкіметтік емес ұйым", "Белсенді үкіметтік емес ұйым",  "Мүгедектігі бар тұлғалардың шығармашылығын белсенді насихаттаушы", "Белсенді демеуші", "Үздік өнерпаздар ұжымы" номинациялары бойынша облыс әкімінің Алғыс хатымен марапатталды.