Сыр бойы

20 қараша күні кешкілік өзен­де күр (толық қатпаған мұз) жүріп, соның салдарынан Қа­залы ауданындағы «Әл­сейіт», «Қарлаң» учас­келері мен Абай ауылының тұсын­дағы қал­қы­ма­лы көпірлер уақытша істен шық­ты. Аудан әкімдігінің бас­пасөз қызметі хабарлағандай, қазіргі кезде жағдай тұрақталды. Өзеннің арғы бетіндегі тұрғындар Басықара ауылы мен «Қарлаң» тұсындағы көпір арқылы  қатынауда.

Қазалы жақтан тосыннан келген қалың сел сол күні түнде Арал ауданындағы Қызылжар, Хан елді мекендерінің тұсында орналасқан қалқымалы көпірлердің шынжырын үзіп кетті. Соның кесі­рінен көпірлер Хан ауылы тұсында – 600, Қызылжар тұ­сын­да 1500 метр­ге дейін жылжыған. Сөйтіп, Аманөткел, Жаңақұрылыс, Қы­зыл­жар елді мекендеріне жол қатынасы тоқтады.

– Бүгінде Хан ауылы тұсын­дағы қалқымалы көпір орнына қойылып, Жаңақұрылыс, Аман­өткел елді мекендеріне ба­ра­­тын жол ашылды. Ал Қы­зылжар тұ­сын­дағы қалқы­малы көпірді ор­нына қоюға әзірге мүмкіндік жоқ. Себебі, дария бойында мұз байқалады. Тө­тен­ше жағдай кезінде қал­қы­малы көпірлердің дария бойы­мен ағып кетпеуін және оларды қайта қалпына келтіру үшін аталған елді мекендердің тұрғындары, ауылдық округ басшы­лары ұйым­шылдықпен атса­лысты, – дейді аудандық тұрғын үй-комму­налдық шаруа­шы­лығы, жолаушылар көлігі және автомобиль жолдары бөлі­мінің басшысы Амантай Тасқынбаев.

Қызылжарма бөлігіндегі мұздың үсті қалыңдатылып, жаяу жүргіншілердің жүруіне қолайлы жағдай жасалып отыр. Сондай-ақ, аудан орталығы мен ауыл арасындағы жолаушылар автобусы, басқа да көліктер қатынасы жолға қойылды.

Облыстық жұмылдыру дайын­дығы басқармасының мә­ліме­тіне сүйенсек, сең жүру маусымы қалыпты өтеді деген сенім бар. Өзен жағалауы су басуы ықтимал 56 учаскеге бөлініп, оларға жауапты 126 мекеме бекітіліп отыр. Тиісінше материалдық-техникалық қор сақадай сай. Қызылорда қаласы мен аудандарда тасқын су кезінде халықты көшіруге арналған 84 эвакуациялық жинақтау, 101 қабылдау пункті әзірленді.

– Қазіргі уақытта Қармақшы, Жалағаш аудандарында 25-30 процент деңгейінде күр жүруде. Дария ахуалы қатаң бақылауда, – дейді басқарма басшысының орынбасары Ғабит Жаңабаев.