Сыр бойы

Жаз бойы тыным таппаған диқан еңбегінің нәтижесі айқындалатын күн жақын. Егіс алқабындағы тынымсыз гүрілдеген комбайндар қарқыны да  бәсеңсігендей. Себебі, қамбаға астық толтырған күріш жинау науқаны да аяқталып қалды. Күз келсе, елдің де күтетіні осы. Ауылдағы ағайынның егінді жинап, қалаға көш-керуенімен келіп, жәрмеңке жасайтыны халықты бір серпілтеді.

Егіннің жайын сұрап, елең­деген елге биыл да Сыр диқан­дары биік межеден көрін­генін сүйіншілейтін күн осы.

Биыл облыс бойынша 183,1 мың гектар жерге егін егілді. Оның ішінде дәнді дақылдар 97,5 мың гектар, майлы дақылдар 7,9 мың гектар, мал азықтық дақылдар 60,2 мың гектар, картоп, көкөніс, бақша 17,4 мың гектар. Негізгі дақыл – күріш 87,9 мың гектар.

Өткен жылы Сыр диқандары гектарына 54,5 центнерден өнім жинап, бірнеше жыл қатарынан жоғары көрсеткіштерге қол жеткізсе, биыл да еңбек еткен елдің несібесін Жер-Ана ортайтпайтынына сенімдіміз.

 Ел ырысын еселеуге үлес қосқан диқандардың еңбегі ел алдында әспеттелетін, береке мен молшылықтың мейрамы – «Алтын дән-2019» салтанаты бүгін өтуді. Жылдағы дәстүрмен облыс орталығының шағын ауданында ауыл шаруашылығы өнімдерінің жәрмеңкесі ұйым­­дастырылады. Бұл қала тұр­ғындары үшін сапалы әрі бағасы арзан қыс азығын қамдап алуға мүмкіндік екені сөзсіз. Өзіміздің өнімнің дәмін өзгеден ерек көретін қалалықтар үшін бұл күн жыл бойы асыға күтер мереке десек те болады.

Бұл күні шабандоздардың делебесін қоздырған ат жарыс ұйымдастырылып, мереке шырайын аша түспек. Биылғы жылы да тай бәйге, құнан бәйге, тоқ бәйге, аламан бәйге ұйымдастырылады.

Ауыл шаруашылығына мем­лекет тарапынан қолдау айтарлықтай. Техни­ка­лар жаңа­рып, шаруашы­лықтар­дың арзан дизель отынымен қамтамасыз етілуі,  ұсақ шаруашылықтарды бірік­­тіру, жеңілдетілген несие­­лендіру – мемлекет тарапынан қолдаудың нәтижесі. Сондай-ақ, инвестициялық жоба­лар­дың жүзеге асуы салаға серпін беретіні сөзсіз.

Айта кетелік, биылдан бас­тап еліміздегі атаулы мерекелер қатарына «Нан күні» және «Ауыл шаруашылығы, тамақ және өңдеу өнеркәсібі» қызметкерлері күнінің қо­сылуы да – еңбеккерлерге деген үлкен құрметтің белгісі.

Гүлмира ДІЛДӘБЕКОВА.