Сыр бойы

Бүгін VI сайланған Қызылорда облыстық мәслихатының кезектен тыс 36 сессиясы болып өтті. Оның күн тәртібіне сай бұған дейін облыстық мәслихаттың хатшысы қызметін атқарып келген Наурызбай Байқадамовтың басқа қызметке ауысуына байланысты депутаттық өкілеттілігі тоқтатылды. Депуттаттық корпустың "Nur Otan" партиясы фракциясы облыстық мәслихаттың хатшылығына № 17 "Мектеп" сайлау округінен сайланған депутат Қылышбай Бисеновтың кандидатурасын ұсынды. Халық қалаулылары бұл ұсынысты бір ауыздан қолдап, Қ.Бисенов облыстық мәслихаттың хатшысы болып сайланды.

Бисенов  Қылышбай Алдабергенұлы, 1957 жылы 21 шілдеде Қызылорда облысы Жалағаш ауданында дүниеге келген.

1974 жылы Қызылорда қаласындағы №4 С.Сейфуллин атындағы орта мектепті алтын медальмен, 1979 жылы В.И.Ленин атындағы Қазақ политехникалық институтын үздік дипломмен  бітіріп шыққан.

1979 жылы еңбек жолын осы аталған институттың «Темірбетон құрастырмалары» кафедрасында стажер-зерттеуші болып бастаған (1979-1980жж).  

1980 жылдан бастап Жамбыл гидромелиоративтік-құрылыс институтының Қызылорда филиалында оқытушы болып еңбек еткен.

 1985 жылы Мәскеу қаласында Бетон және темірбетон ғылыми-зерттеу институтында кандидаттық диссертация, 1995 жылы Ресей Федерациясы Томск мемлекеттік сәулет-құрылыс академиясында докторлық диссертацияны  қорғаған.

1986-1990 жылдары Жамбыл гидромелиоративтік-құрылыс институтының Қызылорда филиалында аға оқытушы, факультет деканы, директордың орынбасары,  1990-1996 жылдары - Ы.Жақаев атындағы Қызылорда агроөнеркәсіп өндірісі инженерлері институтының оқу ісі жөніндегі проректоры, бірінші проректоры, 1996-1998 жылдары  Ы.Жақаев атындағы Қызылорда политехникалық институтының ректоры, 1998-2007 жылдары Қорқыт Ата атындағы Қызылорда мемлекеттік университетінің ректоры болып еңбек еткен.

1996-2007 жылдары  Қызылорда облыстық мәслихатының үш мәрте сайланған депутаты. 2006-2007 жылдары «Нұр Отан» ХДП Қызылорда филиалының төрағасы болып сайланған.

 2007-2011 жылдары Қазақстан Республикасы Парламенті Мәжілісі IV шақырылымының депутаты болып сайланып, әлеуметтік-мәдени даму жөніндегі комитеттің мүшесі болған.

 2011 жылдың 12 тамызы мен 2019 жылдың 21 қаңтары аралығында  Қорқыт Ата атындағы Қызылорда мемлекеттік университетінің ректоры қызметін атқарған.

2019 жылдың 21 қаңтар айынан бастап Қорқыт Ата атындағы Қызылорда мемлекеттік университетінің сәулет және құрылыс өндірісі кафедрасының професссоры, 2019 жылдың 5 сәуір айынан бастап Қорқыт Ата атындағы Қызылорда мемлекеттік университетінің ректордың ғылыми және қоғамдық байланыс жөніндегі кеңесшісі қызметін атқарып келген.

2012 жылдың қаңтарынан   Қызылорда облыстық мәслихатының V, VI шақырылым депутаты. Облыстық мәслихаттың әлеуметтік және мәдени мәселелер жөніндегі тұрақты комиссиясының төрағасы.

Отбасылы, төрт бала және немерелер тәрбиелеп отыр.

"СБ" ақпарат.