Сыр бойы

 Кеше облыс әкімі Қуанышбек Ысқақовтың қатысуымен облыстық мәслихаттың кезектен тыс 35-ші сессиясы өтті. Оның жұмысына ҚР Парламенті Сенатының депутаттары Бекмырза Еламанов пен Мұрат Бақтиярұлы қатысты. Сессия төрағасының міндетін атқарған облыстық мәслихаттың хатшысы Наурызбай Байқадамов күн тәртібін жариялағаннан кейін аймақ басшысы қысқаша хабарлама жасады.

Облыс басшысы 2019 жылдың бюджеті 239,2 млрд теңге болып бекітіліп, үш рет нақтыланып, 297 млрд теңгені құрағанын жеткізді. Сондай-ақ, 2019-2021 жылдарға арналған облыстық бюджет жобасында 14,2 млрд теңге сомасын нақтылауды ұсынды.

«Бұл қаражатты облыстың кезек күттірмейтін басым ба­ғыттағы шығындарына жұм­сау көзделуде. Біріншіден, мем­ле­кеттік атаулы әлеуметтік кө­мек көрсетуге қосымша 5,1 млрд теңге бөлінді. Бұдан басқа, 2019 жылғы 1 маусымнан бастап азаматтық қызмет­шілердің жекелеген санат­тарының жалақысын арттыруға қосымша 967,9 млн теңге; еңбек нарығында сұранысқа ие біліктіліктер мен дағдылар бойынша қысқа мерзімді кәсіп­тік оқытуға 1,1 млрд теңге бағытталды. «Еңбек» мем­ле­кеттік бағдарламасы шең­бе­рінде нәтижелі жұмыспен қам­туды және жаппай кәсіп­керлікті дамытуға кредит беруге 950,0 млн теңге қаралуда», – деді облыс әкімі.

Айта кетейік, облыс бюджеті өзінің әлеуметтік бағытын сақтап келеді. Денсаулық сақтау, білім беру, спорт, мәдениет саласын дамытуға 878,0 млн теңге бағытталды. Бұдан басқа, облыс бюджетінің қалған бөлігі Сырдария өзенінің сол жағалауын игеруге және дамытуға (8 жалға берілетін тұрғын үй құрылысына), облыс орталығын дамытуға; мемлекеттік-жеке­шелік әріптестік аясында 4 жо­баның мемлекеттік міндет­темелерін орындауға және 2 жобаны консультативті қолдау мен олардың конкурстық құ­жаттарын сараптамадан өткізуге бағытталған. Сондай-ақ, жылу беру маусымында бюджеттік мекемелер мен кәсіпорындарды үздіксіз жылумен қамтамасыз ету міндеті бар.

«Айта кету керек, Қызылорда облысы Арыс қаласындағы тө­­тенше жағдай салдарынан зар­дап шеккен тұрғындарға алғаш­қылардың бірі болып көмек көрсетті.

Арыс қаласындағы тұрғын үйлерді қалпына келтіруге және Түркістан қаласындағы ха­лыққа қызмет көрсету кешенін салуға облыстың нақтыланған бюджеті қаражатының бір бөлігі бағытталды», – деп атап өтті аймақ басшысы.

Облыс әкімі бұдан кейін соңғы уақытта аймақта болып өткен қоғамдық-саяси маңызды шаралардан хабардар етті. Байқоңырда «Роскосмос» басшысы Д.Ро­го­зин­­­мен кездесіп, үкімет­ара­лық оты­рысқа ұсынылатын мәсе­лелерді, Байқоңыр бойынша жүзеге асуы тиіс жұмыстарды талқылағанын айтты. Сондай-ақ Нұр-Сұлтан қаласына, Арысқа,  облыс аудандарына жасаған іс-сапар барысы мен автомобилистер мен құрылысшылардың кәсіби мерекелері туралы баяндады. Арыс қаласында Үкімет басшысы Асқар Мамин Сыр құрылысшыларының өздеріне жүктелген міндетті абыроймен атқарғандары үшін алғыс білдіргенін жеткізді.

«17 тамызда сенбі күні Президент тапсырмасына сәйкес, Қазақстан Республикасының Премьер-Министрі Асқар Мамин Түркістан облысында жұмыс сапарымен болды. Жұмыс сапары барысында Асқар Ұзақбайұлына Арыс қаласындағы қалпына кел­тіру жұмыстарының барысы туралы баяндадым. Сыр құрылысшыларына және халқына қиын жағдайда қолдау жасағаны үшін Премьер-Министр өз ризашылығын білдірді», – деді аймақ басшысы.

Облыс әкімі өңірде тұрғындар тарапынан көтерілген мәселелер бойынша іс-шаралар жоспары бекітілгенін еске салып өтті.

– Енді әкімдер тұрғындар көтерген осы  әлеуметтік мә­селелерді шешудің жолдарын қарастыруы қажет. Өйткені, халықтың сенімі біз үшін қашанда маңызды. Бұл тапсырмалардың орындалуы қатаң бақылауда болады, – деді облыс әкімі.

Сессияда сенатор Мұрат Бақтиярұлы сөз алып, Қуанышбек Досмайылұлына облыс әкімі қызметін абыройлы және табысты атқаруына тілектестік білдірді. Ол биылғы республикалық бюджет 10 трлн теңге болып бекітіл­генін, оның басым бөлігі атаулы әлеуметтік көмекке жұм­салып жатқанын жеткізді. Сонымен бірге Қызылорда облысының бюджеті біраз облыстармен салыстырғанда жақсы көрсеткіштермен ерек­шеленетінін айтты.

Сенатор Бекмырза Еламанов өзін-өзі жұмыспен қам­тыған азаматтардың бірыңғай әлеуметтік төлем жасау көр­сеткіші өте төмен болып отыр­ғанын айтып, бұл мәселені басты назарға алуды ұсынды.

Облыс әкімі маңызды мә­селелерді көтеріп отырғаны үшін сенаторларға ризашылығын жет­кізді. Сонымен қатар, Үкі­метке «Батыс Еуропа - Батыс Қытай» автодәлізінің Ақтөбе мен Қы­зылорда аралығындағы жолды ІІ категориядан І категорияға көтеру мәселесі қойылып отыр­ғанын айтты. Оны тезірек қолға алмаса, жол-көлік оқиғасы көбейе беретін болады. Осыған Парламент депутаттарының қолдау көрсетулерін сұрады.

Мұнан кейін 9 маусымда болған кезектен тыс Президент сайлауында «Nur Otan» партиясынан ұсынылған кандидат Қасым-Жомарт Тоқаевтың сайлауалды бағдарламасын насихаттауда бел­сенділік танытқан облыстық қоғамдық штабтың бір топ мүшесіне партияның облыстық филиал төрағасы, облыс әкімі Қ.Ысқақов Президенттің «Алғыс хатын» табыс етті.

Ыдырыс ТӘЖІҰЛЫ.