Сыр бойы

 Қазалы ауданы Абай ауылының тұрғыны Оңдашбай Өтеміс он саусақсыз-ақ кәсіп ашты. 2010 жылдың қытымыр қысында тағдырдан теперіш көріп, он саусағынан бірдей айырылған азамат бұл күнде замандастарына үлгі, іс тігіп, шеберлігін танытып жүр. Өткен жылы ол «Бизнестің жол картасы – 2020» бағдарламасы арқылы қайтарымсыз грант иегері атанды.

Әдепкіде жерлестеріне қолынан шыққан бұйымдарды ұсынған азаматтың мүмкіндігі  жоғары екенін ел білетін. Шеберлігіне тәнті жұрт кәсіп ашуға кеңес берді. Тымақ, мәсі, көрпе-жастық, жабу тігу дегеніңіз ол үшін қиын іс емес. Құйыс­қан, жүген, тоқым секілді ат әбзелдерінен бөлек шебер жасаған киіз үйдің жабдығы да талай жанның ауласына сән беріп, ұлттық құндылықтың жарқын үлгісіне айналған.

– Мемлекеттен алған қайтарымсыз 900 мың теңгеге мен күнделікті тұтынатын өнімдерді тігуге арналған өндірістік тігін машинасын сатып алдым. Бұрын ауылдан ғана тапсырыс алсам, қазір ауданға атым тарады. Іздеп келіп, бұйымтайын айтатындар бар. Бала кезден құмар ісім кәсіпке айналады деп кім ойлаған? Біраз жыл бұрын мал қарап жүріп, аттан құлап едім. Он саусағымды үсік шалып, дәрігерлер кесіп тастау­ға мәжбүр болды. Бірақ осы сынақтан сүрінбей өтемін деп өзіме серт бергенмін. Міне, қазір кәсіпкермін, – дейді Оңдашбай Өтеміс.

Оңдашбайдың шеберханасындағы туындының әрбірі қазақтың қазақылығын айшықтап, ұлы даланың руханиятын түгендеп тұрғандай. Шетелдік қымбат бас киімдерге құмартып жүргендер енді қазақы тымаққа ынтасын арттыра бастады. Оңдашбайдың қолынан шыққан бас киімдер қазір қытымыр қыс­та талайдың шекесін терлетіп жүр. Бір қыста 15-20 адамға құлақшын мен тымақ тігетін көрінеді.

– Өзіңнің мына қоғамға керек екеніңді сезіну де зор бақыт. Жұрт іздеп келіп, қажетін тіктіріп алып жатады. Кәсібімді кеңейтіп, бұл ісімді жандандыра түсу керектігіне көз жеткіздім. Бәлкім, маған қарап, өзгелер де өмір мектебінен алған дәрістерін қолданысқа салар, – деді шебер алысқа көз тастап.

Айтпақшы, кейіпкеріміз тігінмен ғана айналыспайды. Заманауи құрылғыларды да жете меңгерген. Ұялы телефоннан хабары жоқ жұртшылық, істен шыққан аппараттарын келіп жөндетеді. Жұрттан алғыс алған сайын ісі өрге басып, өзі шабыттана түсетін Оңдашбайдың қадамына біз де оң болсын айттық.

Дәулет ҚЫРДАН.

Қазалы ауданы.