Сыр бойы

Сұлу Сырдың бойында орналасқан әсем қала – Қызылорда күн санап құлпырып келеді. Алашқа ана атанған аймақтың бас қаласы– сырбойылықтар мақтан етер шаһар. Өйткені, Қызылорда – тек облыс орталығы ғана емес, сондай-ақ, ғылым мен білімнің мекені, әдебиет пен мәдениеттің қайнаған ортасы, жеті ауданды бір жерге тоғыстырған күретамыр. Бүгінде алып құрылыс алаңына айналған Сырдария өзенінің сол жағалауындағы жаңа қалаға жұрт қызыға қарайды.

Жалпы жоспар бойынша бұл аумаққа 800 пәтерді құрайтын тұрғын үй кешені, әлеуметтік-мәдени және білім беру нысандарын салу көзделген. Сонымен қатар, 100 адамды қабылдай алатын емханасы бар, 300 адамға арналған көп­са­лалы аурухана, музей мен студенттер қалашығы са­лынады. Осында орналасқан 320 орындық ба­лабақшаға бала­лар­ды қа­былдау жүріп жатқанын білдік.

Дария жағасынан үй алған Айгүл Мұсаева есім­ді қала тұр­ғыны өз қуа­нышымен бөлісті.

– Жаңа үйге кіргенімізге екі айдай уақыт болды. Кө­ңіл-күйіміз өте жақсы. Да­рия­ның жағасында болған соң таза ауа, самал жел жанға жайлылық сыйлайды. Қоғамдық көлік те келеді. №18 бағыттағы мар­шрут үздіксіз қатынап тұр. Менің байқағаным, мұнда жас отбасылар көптеп қоныстануда. Кешке қарай аула алдына серуенге шығып, әдемі әңгіме-дүкен құрамыз, – дейді ол.

Сол жағалаудағы құрылыс алаңы 1532 гектар жерді құраса, оның ішінде аумағы 500 гектар жерге бірінші кезекте құрылыс жүргізілуде. Халыққа ыңғайлы және қолайлы өмір сүру ортасы бар, ұлттық сәулеті ерекшеленген, жаңа заманауи көпқабатты үйлер құрылысын салу көзделген. Себебі, соңғы уақытта халық санының артуы қалада тұрғын үй салу үшін қосымша ау­мақты қажет етті. Сондықтан да 5-7-12 қабатты тұрғын үй кешендерін салу жоспарланған. «Қазқұрылыс» ком­­паниясының аумақтық бри­гадирі Нұрымғани Арыз­құ­лов №6 үйдің құрылысы толығымен аяқталғанын және онда тұрғындар  қоныстанып жат­қанын тілге тиек етті.

– Біздің компания құры­лыс­шылары 38 пәтерлі 5 қабатты №6 тұрғын үйді салды. Дәл қазіргі сәтте 35 пәтердің құ­рылыс жұмыстарын то­лы­ғымен аяқ­тап, пайдалануға беру­де­міз. Тұрғындарға қолайлы жағ­дай қарастырылған. Су, жарық, көгілдір отын, интернет, т.б қызметтің барлығы бар деуге болады. Есіктері домофонмен жабдықталған. Сонымен бірге №38 үйдің құрылысын бастап жатырмыз. Бұл да 40 пәтерлі бес қабатты үй. Жоспар бойынша желтоқсанның 25-не дейін тап­сыруымыз керек, – дейді ол.

Сырдария өзенінің сол жаға­ла­уында тиімді ин­вес­тициялық климатты қалып­тас­тыратын әкім­­­шілік-офистік, мәдени-ойын­-са­уық, сауда-көрме, спорт­тық, ком­му­нал­дық, сондай-ақ, ­ме­­шіт­тер­дің, этно­орталықтың, қо­­­­нақ­ үй және элиталық тұр­ғын үй ке­шендерінің, білім, ден­­сау­лық және әлеуметтік объек­ті­лердің, 15 мың адамға ар­­налған стадионның құрылыс­­тарын жүргізу жос­пар­лануда. Жоба бойынша сол жағалауда жаяу жүргіншілерге арналған бульварлар, фонтандар, ланд­шафтық гүл­дермен және әсем бұтақ­тармен көмкерілген ком­по­зицияларды, сондай-ақ бу­ль­вар бойымен ве­лосипед те­буге арналған жолдар, кафе-ресторандар желі­сін орнату көзделуде. Ескі қалалардың сәулеттік элементтерін ке­ңі­нен қолдану және сол жа­ға­­лаудағы жаңа қаланың кел­бетіне ұлттық нақыш беру қолға алынған. Салынатын ғимараттардың қасбеттері шы­ғыс және ұлттық нақышта. Жал­пы, сол жағалаудағы аумақ 15 ауданнан құралатын болады, оның ішінде 11-і аудан, 1-і индустриялық аймақ және 3-і ірі саябақ және гүлзарлар болып қарастырылған. Әрбір тұрғын үй ауданының ішінде мектеп пен балабақша, емхана, дү­кендер және тағы басқа қызмет көрсету орындары орналасатын болады. Бірінші кезекте жүзеге асырылатын аумақта мәдени-танымдық мақсаттағы нысандар салу жоспарлануда. Атап айт­қанда, үлкен ән аре­насы, этнографиялық мұ­ражай кешені, Қорқыт ата интерактивті мұражайы, ба­­­лалар шығармашылығы са­райы, саз мектебі, цирк, драма театр, «Құстар әлемі» оранжереясы мен ме­диа­орталық.

Қаладан қайтар жолда немересін жетектеген  ата- әжені көрдік. Өздерін Үміт, Серік деп таныстырған олар сол жағалаудағы інісінің үйіне қонаққа келгендерін айтты.

– Қазір шамалы уақыт қалаға шықпай қалсаң, көп өзгерістерден қалыс қа­ласың. Мынадай әдемі үй­лерді, әсем ауланы көріп қуанып келеміз. Болашақта шаһарымыздың шырайы од­ан әрі арта түсеріне сенім мол. Барлығы жастардың игілігіне жасалған жақсы дүние ғой, – деп тілектестігін білдірді.

Дарияның жағасында бір қала бар,

Айналған Сыр елінің мақ­танына, –

деп ақын жырлағандай, сәулеті мен дәулеті сәт сайын өсіп, көркі күн сайын артқан қаламыздың гүлденген дәуіріне куә болатын күн алыс емес.

Айсәуле Қарапаева.

Суреттерді түсірген Нұрболат Нұржаубай.