Сыр бойы

Кеше Қармақшы ауданының Жосалы кентіндегі «Оазис» кешені тұсында ірі жол апаты болып, оқиға орнында төрт адам қаза тапқаны туралы жазған едік. Одан кейін облыстық денсаулық сақтау басқармасының баспасөз қызметі тағы бір адамның қайтыс болғанын хабарлады.

«Төрт азамат жансақтау бөлімінде жатыр. Аудандық ауруханаға облыстық көпбейінді ауруханасынан реанимотолог, нейрохирург, травмотолог тәрізді мамандар аттанып кетті. Қажетті медициналық көмек жасалады», – деді облыстық денсаулық сақтау басқармасы басшысының орынбасары Е.Ысқақов. Жол апатынан көз жұмғандар мен жансақтау бөліміндегі адамдар - Қырғызстан азаматтары. 

– Қазір Қылмыстық Кодекстің 345-бабының 4-бөлігімен қылмыстық іс қозғалды. Тергеу-тексеру амалдары жүргізілуде. Тиісті сараптамалар тағайындалады. «Мersedes» ауыр жүк көлігінің жүргізушісі 5-тен 10 жылға дейінгі аралықта бас бостандығынан айырылуы мүмкін, – деді облыстық полиция департаменті тергеу басқармасы бастығының міндетін атқарушы С.Өтегенов.

Оқиға орнына облыстық жедел жәрдем стансасының 3 шақыру тобы дереу барып, жұмыс істеген. Бұл күнде Қармақшы аудандық ауруханасына қажетті мамандар да жөнелтілген.