Сыр бойы

Облыс әкімі Қырымбек Көшербаев Соғыс және еңбек ардагері Бөрібай Құлмановтың үйіне барып, туған күнімен құттықтады.

Аймақ басшысы ардагер ақсақалға ұзақ  ғұмыр тіледі. Сондай-ақ, Б.Құлмановты облыстық ардагерлер кеңесінің төрағасы Серік Дүйсенбаев құттықтап барды.

Өңірдің әлеуметтік-экономикалық дамуына қосқан үлесі үшін ардагерге Қызылорда облысының Құрмет грамотасы табысталды.

Өз кезегінде, Бөрібай Құлманұлы өзіне көрсетілген құрмет үшін алғысын білдірді.

Б.Құлманов 1920 жылы туылған. Еңбек жолын қарапайым ауылшаруашылық саласынан бастады. Ұлы Отан Соғысында Беларусь, Польша, Германия майдандарында соғысты. Соғыс аяқталған жылы Қытайда және Шығыс Түркістан Республикасында құпия миссия атқарды. Елге оралғаннан кейін облыстық  ауыл шаруашылығы басқармасында қызметте болды. Зейнеткерлікке шыққаннан кейін де Қызылорда экспериментальды-механикалық жөндеу зауытында қызмет атқарды. Осындай ел мүддесі жолындағы еселі еңбектері үшін «Қызыл жұлдыз», «Отан соғысы», «Еңбек Қызыл Ту», «Құрмет белгісі», «Құрмет» ордендері және Қазақ КСР Жоғары Кеңесінің Құрмет грамоталарымен марапатталды.