Сыр бойы

Қызылордадағы Мемлекеттік Рәміздер аллеясында Отан қорғаушылар, Жеңіс мерекелеріне орай ішкі істер органдарында абыройлы қызмет еткен ардагерлерге, оның ішінде соғыс ардагерлерінің ерлігін ұлықтау мақсатында салтанатты  жиын өтті, - деп хабарлады syrboyi.kz  облыстық полиция департаментінің баспасөз қызметіне сілтеме жасап. 

Оған салада қызмет еткен Ұлы Отан соғысының ардагерлері, олардың туыстары, облыстық ардагерлер кеңесінің төрағасы, департамент басшылығы, жеке құрам және облыстық ішкі саясат басқармасы қызметкерлері қатыстырылды. Салтанатты шара Қазақстан Республикасы Әнұраны ырғағымен ашылып, ҚР Ішкі істер министрі, полиция генерал-майоры Е.Тұрғымбаевтың құттықтауы оқылды.

Департамент бастығы полиция полковнигі Заппаров Арыстанғани Расылханұлы  ардагерлерді Ұлы Жеңіс мерекесімен құттықтап, жеңімпаз ұрпақтың ерен ерлігі, халқымыздың шексіз қаһармандығы, ерлікке толы Күн тарихымыздың мәңгілік ұмытылмас парағы саналатынын атап өтті. 

Ардагерлеріміздің ықылас-пейілімен, ізбасарларының жүрегіне құйған жігер-қуаты мен озық ойларының нәтижесінде Қазақстан полициясы қызметкерлерінің қатары  нығайып, өркендеп келеді. Мерекелік құттықтау сөз облыстық ішкі істер органдарының Ардагерлер Кеңесінің төрағасы, департамент бастығының кеңесшісі, полиция полковнигі Тұңғышбаев Серікбол Қуатбайұлына беріліп, осынау айтулы күнге орай ардагер полиция қызметкерлеріне жылы лебізін жеткізді.      

Шара барысында Ішкі істер министрі, полиция генерал-майоры Тұрғымбаев Ерлан Заманбекұлының марапаттау жайлы бұйрығы ресми түрде оқылып, министр бұйрығымен 8 қызметкер марапатталды.

Қызылорда ОПД бастығы полиция полковнигі А.Заппаровтың бұйрығымен қызметтік міндеттерін адал атқарған, құқықтық тәртіп пен қауіпсіздікті қамтамасыз етуде ерекше көзге түскен департаменттің  128 қызметкері, оның ішінде 22 ардагер марапатталды.

Сонымен қатар, дәстүрге сай, мереке қарсаңында 20 жас маман ант беріп, құқық қорғау органдарының қатарына алынды. Полиция қатарына жаңа қосылған  жас мамандар қызметті адал және абыроймен атқаруға, Қазақстан Республикасы азаматтарының құқығы мен бостандықтарын қорғауға салтанатты түрде ант берді. Департамент басшылығы полиция қызметкерлерінің қатарын толықтырған қызметкерлерді ант қабылдауларымен құттықтап, оларға қызметте сәттілік тіледі.

Қызылорда облысы полиция департаментінің баспасөз қызметі