Сыр бойы

Қызылордада бокстан ерлер арасында Қазақстан Республикасының V жазғы спартакиадасы басталды. Облыс тарихында алғаш рет ұйымдастырылған жарысқа Нұр-Сұлтан, Алматы, Шымкент қалалары мен барлық облыстардан 17 команда қатысып, 10 салмақ дəрежесі бойынша 146 былғары қолғап шебері жұдырықтасатын болады.

Жарыстың салтанатты ашы­­­луында облыс əкімінің орын­басары Руслан Рүстемов,  ҚР Мəдениет жəне спорт ми­нистрлігі Спорт жəне дене шынықтыру істері коми­те­тінің төрағасы, бокстан Əлем, Олимпиада чемпионы Серік Сəпиев сөз сөйлеп, қаты­сушы­ларға сəттілік тіледі.

– Биыл Сыр өңірінің тари­хында бірінші рет ерлер ара­сында бокстан Қа­зақ­стан Рес­­публикасының спар­та­киа­да­сы өтуде. Бәсеке Сыр спор­­тының дамуына сер­пін беріп, жасөспірімдердің бокс­қа қы­зығушылығын одан әрі арттыра береді деген се­нім­деміз. Ақпан айында басталған еліміздің V жазғы спартакиадасы спорттың 40 түрінен өтуде. Сыр елінде гандбол және бокс түрлерінен жарыстар өткізу жоспарланған.

Спартакиада бағдарламасы бо­йынша ұйымдастырылған спорт түрлерінен Сыр спорт­шы­­­лары еркін күрестен жал­пы­командалық есепте 3-орынды ие­ленсе, гандболшыларымыз 1-орын­ды жеңіп алды. Алты айға созылатын спорттық шара та­мыз айында өз мәресіне жетпек.

Бүгінгі сайысқа қатысу­шы­ларға жақсы көңіл-күй, жо­ға­ры спорттық нәтиже, сәт­тілік пен рухани сергектік ті­лей­мін, – деді облыс әкімінің орынбасары Р.Рүстемов. Мұнан кейін спартакиада  ресми түрде ашылды.

Айта кетейік, бес күнге со­зы­латын бәстің жартылай фи­налы 6 мамыр күні, финалдық кез­десу 7 мамырда өтетін болады.

Қазіргі таңда облыста бокспен 4000-ға жуық спортшы шұғылданады. Оның ішінде 18 балалар мен жасөспірімдер спорт мектебінде 2552 бала шеберлігін шындауда.

Айта кетейік, жуырда Таи­ланд­тың Банг­кок қаласында өт­кен Азия чемпионатында елі­міздің спорт­шылары 7 медаль алды. Олардың арасында жер­лестеріміз Тұр­сынбай Құлахмет алтын медаль иеленіп, еліміздің туын желбіретсе, Қамшыбек Қоң­қа­баев күміс жүлдеге ие болды.

Мейрамгүл ДАУЫЛБАЙҚЫЗЫ.