Сыр бойы

Арал ауданындағы іргелі елді мекеннің бірі – Сексеуіл. Соңғы жылдары көркейе түскен кенттің кеуде тұсынан «Бозой-Бейнеу-Шымкент» мұнай құбыры өтсе, одан әрірек халықаралық «Батыс Еуропа-Батыс Қытай» автокөлік жолы жатыр. Ел экономикасының күретамыры саналатын – теміржол мен жөндеу депосы да осы кенттің басты ажары.

Олай дейтініміз, тұрғын­дардың 70%-і осы салада жұмыс істейді. Түтін саны 2200-ден асып-жығылатын ті­ректі елді мекен Аралдың әлеу­меттік-экономикалық дамуына серпін беретін мұндағы бюджеттік мекемелерден бө­лек, теміржол мен жеке кә­сіпкерлердің де салмағы орасан.

Кентте кәсіпкерлік тізгінін ұстаған жас аналардың бірі – Гүлзия Сақтағанова. Біз білетін «Нәтижелі жұмыспен қамту және кәсіпкерлікті дамытудың 2017-2021 жылдарға арналған бағдарламасы» аясында «Биз­нес-кеңесші» курсын бі­тір­ген жас ана. Қазір Гүлзия «Жас­тар жылы» аясында «Биз­нестің жол картасы-2020» ат­ты  кәсіпкерлікті қолдау мен да­мытудың бірыңғай бағ­дар­ламасы шеңберінде кі­лем жуу жобасын ұсынып, 1500 млн теңге қайтарымсыз грант жеңіп алған. Алынған қаражатқа кі­лем жуатын машина мен кеп­ті­ретін арнайы аппаратын сатып алды. Түрік технологиясы жуылған кілемді 5-6 минутта 95 процентке дейін кептіріп беретін көрінеді. Бүгінде ор­та­лық іске қосылған, халық сұранысына жұмыс істей бас­тады.

– Шыны керек, бұрын бұл қызметті аудан орталығынан ғана көретін едік. Ауылдағы ағайын жергілікті жерде мұн­дай нысанның ашылуын қуана құптап отыр. Себебі, кілемін арқалап, Аралға қарай апаратын тұрғындарға барып-келу шаруасы оңай тимейтін. Ор­та­лықтың арнайы көлігі де бар. Ауыл адамдарын әуре етпей-ақ, үйінен кілемдерін алып кетеді. 12 мыңға жуық халқы бар сексеуілдіктерге Гүл­зия­ның кілем жуу орталығы осылай қызмет жасауда.  Жалпы айтқанда, Сексеуілдегі кәсіпкерлер жыл басында 395 болса, қазір 421 адамға көбейді. Осы жылы солар арқылы 5 нысан ашылып, жергілікті 21 тұрғын жұмыспен қамтылды, – дейді Арал аудандық жастар ресурстық орталығының маманы Ақтілек Есеев.

Айта кету керек, кентте кәсіпкерлікке ұмтылушы жас­тар легі артып келеді. Бүгінде кентте 417 жеке кәсіпкер болса, соның 50-ге жуығы жастар.