Сыр бойы

Ә.Тәжібаев атындағы облыстық ғылыми әмбебап кітапханада республикалық әдеби-мәдени, тарихи-танымдық «Әлімсақ» журналының 10 жылдығына арналған салтанатты шара өтті.

Қонақтар филология ғылымдарының кандидаты Нұрлан Нұрмаханов жетекшілік ететін ұжымды мерейтоймен құттықтап, тілестестік білдірді. Атап айтқанда, облыстық ішкі саясат, мәдениет, архивтер және құжаттама басқармалары, ғылыми әмбебап кітапхана, тарихи-өлкетану музейі, «Сыр медиа» ЖШС, «Өрлеу» БАҰО» АҚ филиалы атынан арнайы алғыс хаттар мен естелік сыйлықтар табыс етілді.

Одан бөлек, басылымның белсенді авторлары шығармашылық ұжымның ізденіс деңгейін жоғары бағалап, еңбегін ерекше атап өтті.

– Уақыт тұрғысынан алғанда он жыл көп емес. Бірақ «Әлімсақ» журналында жарияланған дүниелер, көтерілген мәселелер одан да ұзақ уақыттың жүгін арқалайды. Басылымда тұздық бар. Ол шындыққа негізделеді, – деді ғалым Қазыбай Құдайбергенов.

Кеш барысында өнер көрсеткен жергілікті өнерпаздар салтанатты шараның мазмұнын байыта түсті.

Назерке САНИЯЗОВА.