Сыр бойы

Соңғы 6 жылда мұнай мен газ өндіру көлемінің төмендеуіне қарамастан, Қызылорда облысы осы жылдың бірінші тоқсанының қорытындысы бойынша республиканың қарқынды дамып келе жатқан өңірлерінің үздік бестігіне кіреді: өңдеу өнеркәсібінің даму қарқыны, экономикаға инвестиция тарту көлемі, құрылыс жұмыстарының көлемі және тұрғын үйді пайдалануға беру бойынша аймақтың өсу көрсеткіштері республикада орташа көрсеткіштерден жоғары.

Сейсенбіде Үкімет оты­рысында 2019 жылғы қаңтар-нау­рыз аралығындағы елдің әлеу­меттік - экономикалық да­­­­муы­­ның қорытындылары ай­­­тыл­ды. Ұлттық экономика ми­­нистрлігінің мәліметіне сәй­кес, Қызылорда облысы өңдеу өнер­кәсібінің өсу қарқыны, экономикаға инвестиция тар­ту, құрылыс жұмыстары мен тұр­ғын үйді пайдалануға беру бойынша – көшбасшылар қа­тарында.

«2019 жылдың І тоқсанында негізгі капиталға салынған инвестиция 84 млрд теңгені құрап, өткен жылдың есепті кезеңімен салыстырғанда 2,3 есеге өсті. Бұл республика бойынша ең үздік көрсеткіш (республикада орташа өсім 7% құрады)», – дейді облыстық индустриялық-инновациялық даму басқармасының басшысы Ринат Сұлтангереев.

Өңдеу өнеркәсібіне тартыл­ған инвестиция көлемі  4,1 млрд теңгені құрап, өткен жылдың сәйкес кезеңімен салыстырғанда 2,3 есеге өсті.

«Жалпы, соңғы 6 жылда өңдеу өнеркәсібі өнімінің өн­діріс көлемі 71%-ке артты. Бұл көрсеткіш республикада аталған кезеңде орташа есеппен 16,2% құрайды», – деп атап өтті Р.Сұлтангереев.

Құрылыс саласында да оң серпінге қол жеткізілді. Мәселен, орындалған құрылыс жұмыстарының көлемі 20,4%-ке ұлғайды, ал республикада орташа өсу көрсеткіші  8,9%-ті құрап отыр. 126 мың шаршы метр тұрғын үй пайдалануға берілді. Бұл  өткен жылдың сәйкес кезеңімен салыстырғанда 13%-ке артық. Естеріңізге сала кетейік, 2018 жылы Қызылорда облысы пайдалануға берілген тұрғын үй көлемі бойынша рекордтық көрсеткішке қол жеткізді, яғни 700 мың шаршы метр баспана бой көтерді.

«2019 жылдың қаңтар-наурыз айларында құрылыс жұмыстарының көлемін арттыру (120,4%) Арал және Қазалы аудандарында газ және мұнай магистральді құбырлары, компрессорлық станция құрылысы, Шалқия кенішінде сыртқы электрмен жабдықтауды қайта құру, Сырдарияның сол жа­ға­лауын­дағы құрылысты дамыту есе­бінен жүзеге асырылды. 2019 жылдың қаңтар-наурыз ай­ларында тұрғын үй­лер­ді пайдалануға беру өсі­мі жеке тұрғын үйлерді пай­да­лануға беру есебінен 12,9 процентке артты. Бұл халықтың мүмкіндігінің, та­­быс­ының арт­қанын көр­сетеді», – деді облыстық құ­ры­лыс, сәулет және қала құ­ры­лысы басқармасы бас­шы­сы­ның орынбасары Арнұр Нұрмағамбетов.

Облыс әкімінің

баспасөз қызметі.