Сыр бойы

 «Мұз айдыны» спорт кешенінде мәнерлеп сырғанаудан әлем чемпионатының күміс жүлдегері Элизабет Тұрсынбаеваның жүлдесіне арналған «Көктем жұлдыздары» атты ашық турнир өтті. Екі күнге созылған жарыстың ашылу салтанатына облыс әкімінің орынбасары Руслан Рүстемов, «ҚазГерМұнай» БК» ЖШС бас директоры Мұрат Мұстафаев қатысты.

Сайысқа Өзбекстаннан, Нұр-Сұлтан, Алматы, Шымкент қалаларынан, Ақтөбе, Қостанай, Қарағанды және облысымыздан­ мәнерлеп сырғанаушылар келген. Байрақты бәсекеде 8 команда, 150-ге жуық спортшы бақ сынасты.

– Мәнерлеп сырғанау – спорттың ең әдемі түрі. Бұл жерде нәзіктік, ерекше дарын, шеберлік қажет. Біздің елде аталған спорттың дамуына жағдай жасалған. Осы күні 50-ден аса жас өздерін Элизабеттің ізбасарлары санап, мәнерлеп сырғанауға машықтануда. Бүгінгі шара­ қатысушыларының көп­тігі осының айғағы, – деді облыс әкімінің орынбасары Руслан Рүстемов.

Шара барысында «Қаз­Гер­Мұнай» БК» ЖШС бас директоры Мұрат Мұс­тафаев та Элизабет Тұрсынбаеваға жүрек­жар­ды лебізін білдіріп, қа­ты­сушыларға сәттілік тіледі.

Мәселен, Нұр-Сұлтан қаласынан келген 29 мә­нерлеп сырғанаушының ішін­де республикалық чем­­­пио­наттардың жүл­де­­гер­­­лері бар. Олардан жат­тық­тырушы Александра Брежнева зор үміт күтеді.

– Турнирдің ашылу сал­та­­на­тының өзі жоғары дең­гей­де өтіп жатқан соң, әрі қарай пайымдай беріңіз. Ұйым­дастырушыларға ал­ғы­сым зор. Ал шәкірттеріме кел­сек, барлығы жеңіске лайық, – дейді ол.

Ашылу салтанатында жергілікті өнерпаздар ән шырқап, мерекелік көңіл-күй сыйлады. Мұз айдынына Элизабет шыққанда жұрттың ықыласы ерекше болды. Қаршадай қыздың өнеріне дән риза туған елі тағы бір қошеметтің құшағына бөледі.

Дәулет ҚЫРДАН.