Сыр бойы

  «Мұз айдыны» спорт кешенінде мәнерлеп сырғанаудан әлем чемпионатының күміс жүлдегері Элизабет Тұрсынбаеваның жүлдесіне арналған «Көктем жұлдыздары» республикалық ашық турнирі басталды. Екі күнге созылатын жарыстың ашылу салтанатына облыс әкімінің орынбасары Руслан Рүстемов пен «ҚазГерМұнай» БК ЖШС бас директоры Мұрат Мұстафаев қатысты.

Сайысқа Өзбекстаннан, Нұр-Сұлтан, Алматы, Шымкент қалаларынан, Ақтөбе, Қостанай, Қарағанды және Қызылорда облыстарынан мәнерлеп сырғанаушылар қатысуда. Байрақты бәсекеде 8 команда, 150-ге жуық спортшы бақ сынаспақ.

– Мәнерлеп сырғанау – спорттың ең әдемі түрі. Бұл жерде нәзіктік, ерекше дарын, шеберлік қажет. Біздің елде аталған спорттың дамуына жағдай жасалған. Осы күні 50-ден аса жас өздерін Элизабеттің ізбасарлары санап, мәнерлеп сырғанауға машықтануда. Бүгінгі шараның қатысушыларының көптігі осының айғағы, – деді облыс әкімінің орынбасары Руслан Рүстемов.

Шара барысында «ҚазГерМұнай» БК ЖШС бас директоры Мұрат Мұстафаев та Элизабет Тұрсынбаеваға жүрекжарды лебізін білдіріп, қатысушыларға сәттілік тіледі.

– Мұндай сайыстың маңызы зор. Талантты жастарды талаптандырады, биікке қанаттандырады. Ал Элизабет қарындасымызға қолдау толастамақ емес. Оның әлі де алар асуы алда. Ал бүгінгі сайыстың қатысушыларына сәттілік тілеймін, – деді ол өз сөзінде.

Бірнеше мемлекет көз тіккен дода тартысты өтеді деп күтілуде. Мәселен, Нұр-Сұлтан қаласынан келген 29 мәнерлеп сырғанаушының ішінде республикалық чемпионаттардың жүлдегерлері бар. Олардан жаттықтырушы Александра Брежнева зор үміт күтеді.

– Турнирдің ашылу салтанатының өзі жоғары деңгейде өтіп жатқан соң, ары қарай пайымдай беріңіз. Ұйымдастырушыларға алғысым зор. Ал шәкірттеріме келсек, барлығы жеңіске лайық. Елордаға олжалы оралатынымызға сенемін, – дейді ол.

Ашылу салтанатында жергілікті өнерпаздар ән шырқап, мерекелік көңіл-күй сыйлады. Ал мұзға Элизабет шыққанда жұрттың ықыласы ерекше болды. Алаңда ұршықша айналған қаршадай қыздың өнеріне тәнті туған елі тағы бір перзентін төбесіне көтерді.

Иә, мұз үстінде өнер көрсеткенмен жұрттың ыстық ықыласына жылынған қазақ қызы сонау биіктерге көз тастады. Оның арманы да асқақ, мақсаты да биік...

Дәулет ҚЫРДАН,

«Сыр бойы».