Сыр бойы

Жанқожа батыр ауылы – аудан көлеміндегі ең көрікті елді мекендердің бірі. Ауыл іргесіндегі арнасынан асып, шалқып жатқан Ащыкөл, асфальт көшелер, түнгі жарықпен безен­дірілуі, еңселі салынған нысандар, жаз мезгіліндегі жайқалған жасыл желектер, әсем саябақ бұл күнде ауыл тірлігінің жақсара бастағанын аңдатады.

Аудандағы елді мекендер арасын­дағы жалғыз «ха­лық  теат­ры» атағы бар мәдениет үйі де осында орна­ласқан. Марат Жақ­сылықов есімді аза­мат басшылық жа­сайтын мәдениет ошағының ауласына бас сұқсаңыз, жел­мен тербелген сыңсыған талдар жа­ныңды жа­дыратады. Ауыл ор­та­лы­­ғындағы биік стелла, Жанқожа Нұр­мұхамедұлы мен Ақтан Ақайұлы бабамыздың бейнесі, жұртшылықтың жұмылуымен салынып жатқан «Сарқұл қожа» атындағы мешіт көңіліңе шат­тық құйып, ертеңгі күнге нық сенім ұялатады. Ауыл тұрмақ, кейбір аудан орталығының өзінде кездесе бермейтін спорт кешенінде Ғанибек Рзабай бастаған білікті бапкерлер жас спортшылардың шеберлігін шыңдауда. Кезінде грек-рим күресінен атағы Кеңес одағына танылған Сәбит Болатов түлеген ауылдан келешекте Олимпиада шыңын бағындырар саңлақтар шықса, кездейсоқтық  саналмас.  

Жағымды жаңалықтар легі мұнымен шектелмейді. Жанқожа батыр ауылы облыстық «үздік ауыл» байқауында жеңімпаз атанғанын, округ әкімі Сапарбек Қуатовтың аймақ басшысының қабылдауында болып, 10 миллион тең­генің сертификатын иеленгенін бұған дейін де жазған едік.

Елді мекендегі танымал спортшы, білікті педагог Алик Тілеумбетов басқа­­ратын №94 мектеп ұжымы қандай да мақтауға лайықты. Шәкірттерінің өнер, білім саласындағы алған асулары тым қомақты. Мектеп ұжымы аудандық, аймақтық спорт жарыстарын, түрлі шаралар өткізуде қашанда ұйым­шылдық  танытады.

Жуырда ауыл ұстаздары тағы да белсенділік танытты. Мектеп мұға­лімі Рамазан Нұрымның дәстүрді дәріп­теудің үлгісі ретінде ұлттық киім киіп жүру туралы ұсынысын әріптестері бір ауыздан қолдады. Мектеп ұжымы қазір жұмысқа ұлттық киіммен келеді. Мұндай қадамның өскелең ұрпақтың зердесіне отансүйгіштік сезімді қалып­тас­тырып, ұлтжандылыққа баулуға ти­гізер септігі де аз емес.

Жұмабек ТАБЫНБАЕВ,

Жанқожа батыр ауылы.