Сыр бойы

Ғарышқа үш рет ұшқан алғашқы қазақ-ғарышкері, Қазақстанның Халық Қаһарманы, Қазақстан Республикасы авиацияның генерал-лейтенанты, техника ғылымдарының докторы, ҚР Парламенті Сенатының депутаты Талғат Мұсабаев "Ғарыш. Ғылым. Интеллект" ІХ Наурыз кездесуіне қатысып, ғарыштағы жұмысы туралы айтып берді.

"Менің есімімді ұшқыш, Кеңес Одағының екі мәрте батыры Талғат Бигелдиновтің құрметіне қойған. Ол жойғыш ұшақта 300-ден астам сапар шегіп, бірде-бір рет оқыс жағдайға тап болмаған. 12 сәуір, Юрий Гагариннің ғарышқа ұшқан күні бізді, яғни оқушыларды мектепте жинап, алғаш рет адам ғарышқа ұшты деп жариялады. Барлығы жүгіріп, "Мен Гагарин, мен ғарышкермін" деп айқайлай бастады. Мен сол кезде: "Мен Талғат Мұсабаев, мен ғарыштамын!" дедім. 33 жылдан кейін мен шынымен ғарышқа ұштым", - деді Т.Мұсабаев.

Ғарышкер өзінің ғарышқа сапарын Елбасы қолдауының арқасында жүзеге асқанын айтты.

"Негізінен ғарышқа 25-27 жастағылар ұшады, ал мен 40 жасымда алғаш рет ұшқан едім, сол себепті оңай болған жоқ. Салауатты өмір салтын ұстанатыным көп көмегін тигізді. Осыдан кейін Тәуелсіз Қазақстанның ғарыш саласының қалыптасуына өз үлесімді қостым, сондықтан менің арманым орындалды деуге болады. Сіздерге оқуда табыс және армандарыңыздың орындалуын тілеймін", - деді Талғат Мұсабаев.

17-19 наурыз аралығында Қызылорда қаласындағы химия-биология бағытындағы Назарбаев зияткерлік мектебінде Наурыз мейрамы қарсаңында " Ғарыш. Ғылым. Интеллект" тақырыбында IX Наурыз кездесулері өтуде. Іс-шараға қазақстандық ғарышкерлер Айдын Айымбетов пен Талғат Мұсабаев, сондай-ақ, SpaceX және NASA сияқты ғарыш ұйымдарының ғылыми қызметкерлері қатысты. Дәстүрлі Наурыз оқуларына бүкіл Қазақстан бойынша 200-ге жуық оқушы қатысады.