Сыр бойы

Қазақтың ән өнерінде өзгеше өрнек салған Кенен Әзірбаевтың 135 жылдығы Сыр елінде аталып өтті. Өнер қайраткері, екі мәрте «Ленин» және «Құрмет белгісі» ор­денін алған халық ақынына ар­нал­ған «Ән кемеңгері» атты тағылымды шараға  Жетісу жерінен келген Төрткен Кененқызы қатысты.

Өз шығармашылығында он­даған эпикалық жыр-дас­тандарды жырлап, тың­дау­шысының құлақ құрышын қандыра білген ұлы тұлғаның тойы Қорқыт баба жерінде аталып өтуінің де өзіндік сыры бар. Жамбылдай жыр алыбын ұстаз тұтып, Сырда туған Нар­тай ақынмен дос-замандас болған Кенен атаның осы тойы Жетісу мен Сыр бойындағы ән өнерінің тоғысуының тым әріде жат­қанының тағы бір дәлелі, үзіл­мес достық нышаны болып табылады.

Облыстық ­филармония ұйымдастырған ке­ште қы­зыл­ордалық дәс­түрлі әнші-жыршылар Кенен атаның әндерін әуелетіп, айтыс-толғаулары мен арнауларын нақышына келтіре орындады. Ұлттың ән өнерін ұлықтаған кеште облыс әкімінің орынбасары Руслан Рүстемов шараның рухани тағылымы мол, құндылығы  ерекше екендігін айтып өтті.

– Қазақ жері таланттар шоғырына бай. Соның бірі – Жетісу ән мектебінің көр­некті өкілі, бүгінгі ұрпақ сабақ­тастығы аясында 135 жылдық мерейтойы тойланып жатқан Кенен Әзірбаев. Біз  ұлттық құндылықтарымызбен мақтануымыз қажет. Сондай құндылықтың бірі  – қазақтың ән өнері. Бабалар мұрасына баса назар аударуда бүгінгі кеш соның бір айғағы болып тұр. Кенен атамыз тек әнші емес, ақындық пен жыршылықты, сал-серілікті, айтыс өнерін бір бойына қалыптастырған адам. Осындай тұлғаның талан­тын тани түсу, ұрпаққа ұлықтау біздер үшін бұлжымас қағида болуы керек, – деді облыс әкімі­нің орынбасары.

Кеште қонақ болған ақын­ның қызы Төрткен Кененқызы барлық сырбойылықтарға шек­­сіз алғыс айтты. Ақ батасы мен шынайы тілегін жау­дырған ол Кенендей халық ақынын дәріптеген қызыл­орда­лықтардың бұл игі ісі көпке үлгі болатынын да айтып қалды.

– «Сыр елі – жыр елі» деген құлаққа сондай бір жағымды естілер сөз ғой. Осындай қа­сиетті жерде өзге облыстарға үлгі боларлықтай жақсы дүние көрсетіп жатырсыздар. Әкем мен Сырда туған Нартайдың достығы ол бір бөлек әңгіме. Бұрындары басқалай еді. Әр облыс өзінен шыққан белгілі азаматын мадақтаумен шектелетін. Бірақ, ол азаматтар заманында өзі туған өлкеге емес, тұтас елге қызмет қылды емес пе?! Сіздер жақсы бастама көтеріп отырсыздар. Кенендей даңқты тұлғаларды дәріптеу – барша елге игі іс, үлкен үлгі деп есептеймін, – деді Төрткен Кененқызы.

Өнерде шекара жоғы рас. Бүгінде Кенен мен Нартай ақын арасындағы шығармашылық байланыстың ұрпақпен бірге жалғасарына сенім мол. Шарада қазақ өнерінің қазанын қайнатқан Кенендей алыптың қызы Төрткен анамызға дәс­түрлі жоралғымен қамзол кигі­зіліп, иығына орамал жабылды. Өз кезегінде ақынның қызы аймақ халқына Кенен ұрпақтары атынан ал­ғысын білдірді.

Ержан ҚОЖАСОВ.