Сыр бойы

Аймақта тамшылатып суару әдістерін қолдана отырып, көкөніс өсіру жұмыстары жалғасуда. 60-тан аса жылыжай жұмыс жасап тұр. Осындай кешен салып, аймақтағы баға тұрақтылығына септігін тигізетіндер саны артып келеді. Ауыл шаруашылығы басқармасының көрсеткішіне жүгінсек, 2018 жылы облыста барлығы 7 гектарға жуық алқапта жылыжай жұмыс істеп, 385 тоннадан астам өнім жиналған.

Қала аумағында салынған 122 жылыжайдың бүгінде 52-сі жұмыс жасайды екен. Олардың барлығы өңір сұранысын толықтай қамтымаса да, тұрғындардың қа­жетін ішінара өтеп тұр. Атап айтқанда, қаланың батыс бөлігінен «Ауыл шаруашылығын қаржылай қолдау қоры» АҚ-ның есебінен 5 гектар жерге құрылыс жүргізіп, жылыжай кешенін салған жеке кәсіпкер «Натишаева» мен «Oрда» шаруа қожалығы 100 тоннадан аса өнім алған. Сонымен қатар, «Натишаева» жеке кәсіпкерлігінің Қарауылтөбе ауылында өз қаржысы есебінен салынған жалпы көлемі 1 гектарды құрайтын жылыжайда былтыр егілген көкөністен барлығы 65 тонна қияр, 23 тонна қызанақ жиналған. Бұдан өзге «Ақбота-Бақдәулет» ЖК есебіндегі 0,4 гектарлық жылыжайдан екі маусымдық кезеңді қамтығанда 1,5 тонна қияр, 1,7 тонна қызанақ алынып, қаланың сауда орындарында сатылған. «Натишаева» жылыжайындағы өнім қазіргі таңда жиналу үстінде, ал «Ақбота-Бақдәулет» кешенінде көкөніс көшеттері маусымдық кезең бойынша отырғызылған.

Тағы бір сүйіншілейтін жаңа­лық, биыл Қызылорда қала­сын­да «ҚазАгроМир» ЖШС-нің кө­­­ле­мі 2 гектардан асатын авто­мат­­тан­ды­рылған кешенді жы­лы­­жай жобасы іске қосылмақ. «Қаз­Агро­Қаржы» АҚ арқылы қар­жы­­ландырылған жылы­жай жаңа тех^­нология негі­зін­де жұмыс істейді. Қазіргі таң­да құрылыс толық аяқ­та­лып, су және электр жүйелерін ор­нату жұ­мыс­тары жүр­гізілуде. 1 миллиард тең­ге­ден астам қаржыны құраған бұл жо­ба арқылы жылына 900 тонна то­мат өндіріледі деп жоспарланып отыр.

Сондай-ақ, ауыл шаруашылығы басқармасының мәліметінше, Шиелі ауданында 20 жеке кәсіпкердің бірігуімен жалпы көлемі 2 гектар болатын, қуаттылығы жылына 60 тонна көкөніс өнімдерін өндіретін жылыжай желісінің құрылысын салу жобасы да бар. Мұнан өзге, алдағы уақытта «Орда» шаруа қожалығы жылыжай аумағын 5 гектарға кеңей­ту жұмыстарын жүргізбек. Атал­ған нысандар іске қосылса, ай­мақ кәсіпкерлігінің көкжиегін кеңейтетін жылыжай шаруашылығы алға басар күн де алыс емес. Қытай мен көршілес өзбектің өнімін өз­деріне ысырып, еліміздің әр түкпіріне Қызылордадан қызанақ пен қияр тасымалданады деген мол сенім бар.

Ержан Қожасов.