Сыр бойы

Кеше өткен облыстық мәслихаттың кезектен тыс 26-сессиясына облыс әкімінің міндетін атқарушы Қуанышбек Ысқақов қатысты. Сессия төрағасы, депутат Шәкизада Әбдікәрімов күн тәртібінде облыстық сайлау комиссиясының жаңа құрамын сайлау туралы бір ғана мәселе қаралатынын мәлімдеді.

Мұнан соң аталған мәселеге қа­тысты уақытша комиссия төрағасы Ібай­дулла Тілеп хабарлама жасады. Ол 2018 жылдың 30 қарашасында ресми басы­лымдарда облыстық сай­лау комиссиясының жаңа құра­мын қа­­лыптастыруға қатысты облыс­тық мәсли­хаттың хабарламасы жария­лан­ғанын еске салып өтті. Онда Қызыл­орда облысының аумақтық сайлау комиссиясының құрамында 7 мүше болатыны, соған орай әрбір саяси партия 1 кандидатура ұсынуға құқылы екені хабарланған. Саяси партиялар, өзге қоғамдық бірлестіктер, олардың құрылымдық бөлімшелеріне өз кандидатураларын 2018 жылдың 20 желтоқсанына дейін ұсыну міндеттелді.

Осыдан кейін белгіленген мерзім аралығында бес саяси партия мен үш қоғамдық бірлестік өздерінің кандидатураларын ұсынды. Алайда 25 желтоқсанда «Сыр мейірімі» қоғамдық-әлеуметтік қоры  өздерінің ұсынған кандидатурасын қараусыз кері қайтару туралы хат жолдаған. Мұнан кейін қалған жеті қандидатураға қатысты тиісті анықтамалар алынған.

І.Тілеп осы аталған мәселе уақытша комиссияның  сессияға дейінгі отырысында жан-жақты талқыланып, түбе­гейлі зерттеліп-зерделенгенін мәлімдеді. Ол жеті орынға жеті адам ұсынылып отырғандықтан оларды ашық дауыспен сайлау туралы ұсыныс енгізді. Ұсыныс қабылданып, депутаттар кандидаттарды ашық дауыспен сайлады.

Сонымен Қызылорда облыстық сайлау комиссиясы құрамына «Нұр Отан» партиясынан Әділбек Ерсұлтанов, «Ауыл» Халықтық-демократиялық па­­триот­­тық партиясынан Абайбек Жү­нісов, Қазақстан коммунистік халық партиясынан Аягөз Сырлыбаева,  Қазақстанның «Ақжол» демокра­тиялық партиясынан Қожамжар Наурызбаев, «Бірлік» саяси партиясынан Бағдат Бер­дәулетов, «Қызылорда облы­сының Азаматтық Альянсы» Қауым­дас­тығынан Мұрат Балабаев және «Мәр­тебелі Қазақстан» қоғамдық қорынан Әнуәрбек Дәрмағанбетов сайланды.