Сыр бойы

Балаларды өрт ішінен алып шығуға талпынып, түтінге уланған екі Қызылорда тұрғынының жағдайы бірқалыпты, деп хабарлайды «Хабар 24».

Бірі үйіне жіберілсе, екіншісі токсикология бөлімінде ем-дом қабылдап жатыр. Дәрігерлердің айтуынша, науқастың өміріне еш қауіп төніп тұрған жоқ.

Естеріңізге сала кетсек, Қызылорда қаласындағы «Наурыз» саяжайында орналасқан жеке тұрғын үйден өрт шығып, түтінге тұншыққан екі бала сол жерде қаза болса, біреуі жедел жәрдем көлігімен тасымалдау барысында көз жұмды. Жалпы жыл басталмай жатып облыста 15 өрт оқиғасы тіркеліп отыр. Былтыр тілсіз жау 14 адамның өмірін қиған болатын.

Бағлан Сұлтан, анестезиолог-реаниматолог, токсиколог:

- Бірінші науқас жеңіл түрде терапия алып, үйіне қайтарылды. Жағдайы жақсы болғаннан кейін. Екінші науқас өте ауыр жағдайда келіп түсті. Жансақтау бөліміне көтеріліп, дезинтоксикациялық емдер тағайындалып, дер кезінде көмек жасалды. 1 тәуліктен кейін реанимациядан токсикология бөліміне аударылды. Қазіргі таңда науқас жағдайы орташа ауырлықта.