Сыр бойы

Қадірлі қызылордалықтар!

Жаңа 2019 жыл баршамызға құтты болсын!

2018 жыл аймағымыз үшін барлық салалар бойынша жетіс­тіктерге толы жыл болды. Біздің облыс әлеуметтік саланың дамуы, өңдеу өнеркәсібі мен аграрлық сектордың қарқыны, тұрғын үй құрылысының көлемі мен шағын және орта кәсіпкерлікті дамыту бойынша үздіктер қатарында.

Сырдарияның сол жақ жағалауында жаңа қаланың бірінші шағын ауданы салынды, барлық елді мекендерде, ұжымдарда жаңа өзгерістер мен жағымды жаңа­лықтар бар.

Әсіресе өскелең ұрпақтың білімге-ғылымға, жаңалықтарға деген талпынысы бізді ерекше қуан­тады. Екінші жыл қатарынан облыстың мектеп түлектерінің 97 пайызы жоғары оқу орындары мен колледждердің студенттері атанды.

Құрметті жерлестер!

Алаштың анасы – киелі де қасиетті Сыр елінің өркендеуі – әрбіріңіздің туған аймақтың дамуы мен өсуі үшін еткен еңбектеріңіздің нәтижесі.

Тағы да бір жылды абыроймен аяқтағанымыз үшін Сіздерге риясыз алғысымды білдіремін және аймағымыздың әрі қарай да  толағай табыстарға жете беруін тілеймін.

Жаңа жылда барлық ізгі арман-тілектеріңіз орындалсын! Сіздерге табыс, денсаулық, бақыт, береке-бірлік тілеймін!

Елбасының бастауымен Тәуелсіз Қазақстанымыз көркейіп, ашық аспанымызда бейбітшілік  туы желбіресін!

Жаңа жылдарыңыз құтты болсын!

Ізгі тілекпен,

Қызылорда облысының әкімі                    Қ.Көшербаев.