Сыр бойы

Түркі дүниесі тәу етер кешен – Қорқыт ата мемориалын та­ма­шалау барысында біз Чехия Республикасынан келген кәсіпкермен тіл­­дестік. Яков Ходорковский – «Development Velas» компания­сы­ның өкілі екен. Қызылордаға алғаш келуі емес. Бұған дейін өңір­дегі іскерлік кездесулерде болыпты. Алайда, ол киелі жерлерге саяхаттауға мүмкіндік тумағанын айтты.

– Тарих тереңіне бойлау – әрбір азаматтың борышы. Осыған дейін мен Түркістандағы Қожа Ахмет Яссауи кесенісіне бардым. Бүгін сіздердің өлкелеріңіздің өткенімен танысуға мүмкіндік туды. Сіздерге туристік әлеует­ті дамытуға күш салу керек, мұн­дай маңызды нысанға әлі мыңдаған саяхатшының қызығу­шылығы ауады деген ойдамын. Ұй­ымдастырушыларға алғыс. Мұн­дай форум – туристік кластер­ді қалыптастырудан бөлек, жаңа жұ­мыс орындарын ашуға, жоғары технологиялық өндірістерді орна­ластыруға үлкен көмек. Орайы келгенде айта кетейін, жуырда біз Жаңақорған ауданы, Шалқия кентінен қуаттылығы 50 МВт құ­райтын күн сәулесінен энергия өндіретін станция құрылысын бастамақпыз. Оның аясында 100-ден астам жа­ңа жұмыс орны ашылады, – деді Я.Ходорковский.

Мұнан кейін меймандар әлем­­дегі теңдессіз ғарыш айлағы – «Бай­­қоңыр» кешенінде болды. Мұ­ражайды аралап, атақты конс­т­руктор Сергей Королев, Юрий Гагарин бастаған ержү­рек ға­рышкерлер туралы қызықты мә­­ліметтерге қанықты. Шара «Союз МС-11» көліктік басқа­ры­­латын кемесі бар «Союз ФГ» зы­мыран-тасығышының ұшуы­мен қорытындыланды. Халық­аралық ғарыш станциясы кемесі бортының экипаж құрамында кеме командирі, ресейлік ғарышкер Олег Конаненко, канадалық Давид Сан-Жак және американдық ғарышкер Энн Макклейн бар. Бұл – 11 қазан күні «Союз МС-10» кемесі бар «Союз ФГ» зымыраны апатқа ұшырағаннан кейін жасалған алғашқы ұшырылым. Айта кетейік, зымырандық стартты тамашалауға келгендердің кө­бі дерлік шетелдіктер болды. Олардың қатарында «Франция – Қазақстан» парламенттік дос­тығы тобының төрағасы, Франция ұлттық ассамблеясының депутаты Пьер Кабарэ бар.

– Қызылорда – ғарыш сала­сының символы іспетті. Мен өзім Францияның аэроғарыш саласы дамыған Тулуза қаласынанмын. Бұл жер – «Airbus» компания­сы­ның отаны. Қазіргі таңда танымал компания әлемдегі жолау­шы ұшақтарының жартысына жуығын шығарады. Инвест форумда сауда-экономикалық, оның ішінде дәл осы аэроғарыш өнеркә­сібіндегі өзара тиімді әріптестік, сондай-ақ тікұшақтар құрастыру және оларға техникалық қыз­мет көрсету жөніндегі ынтымақ­тас­тықты нығайтудың келешегі талқылануы қажет. Француз та­рапы экотуризмді дамыту тәжі­рибесімен бөлісуге де дайын. Біз Қазақстанмен, оның ішінде сіз­дермен бірге әріптестігімізді одан әрі нығайтып, достық қарым-қатынасты дамытқымыз келеді, – деді П.Кабарэ.

Әрі қарай біз тарихи сәттің куәсі болдық. Зымыран орбитаға енемін дегенше, аспандағы көрініс баршаны таңдандырды. Іштей «Орайын тауып, шетелдіктердің бұл қызығушылығын олжаға ай­нал­дырсақ, ұтылмасымыз анық» деген ойға қалдық.