Сыр бойы

Өңірлік коммуникациялар қызметінде Елбасының «Ұлы даланың жеті қыры» мақаласын талқылау үшін баспасөз конференциясы өтті. Оған «Дін мәселелерін зерттеу» орталығының теолог маманы Бақтияр Оспанов пен облыстық халық шығармашылығын дамыту және мәдени-продюсерлік орталығының сектор меңгерушісі Майра Сәрсенбаева қатысты.

– Мемлекет басшысының «Ұлы дала­ның жеті қыры» мақаласы «Болашаққа бағдар: рухани жаңғыру» мақаласының жал­ғасы. Бұл мақалада Қазақ хал­қының тереңнен бастау алатын тарихи және мәдени ерек­шеліктері, сондай-ақ, әлем­дік өркениетке қосқан өзіндік үлесі туралы жазылған. Мақаланы оқи отырып, тарихтың тұңғиығына сүңгіп кетесің, – деді Б.Оспанов.

Теолог маман Бақтияр Есен­гелдіұлы грек аңыздарының бар­лығында Геркулес, Геракл, Зена сынды батырлары атала­тындығына назар аударды. Бірақ олар ешқашан кентавр­лар­мен соғыспайды. Керісінше олар­мен үнемі мәміледе болады. Сол кентаврлар біздің көш­пенді бабаларымыз еді. Ат­ үстінде өздерін еркін ұс­тай білетін ержүрек батыр ре­тінде аңыздарда кентавр қал­пында қалдық. Жалпы осы арқылы ата-бабаларымыз кеңістікті уақытты өте жылдам игерді. Бұл туралы көптеген ғалымдар, ғұламалар ой қозғады. Тіпті сол заманда біздің ата-бабаларымыз уақыт­тың, мәдениеттің католизаторына айналды деген ұғым бар.

Облыстық халық шығарма­шылығын дамыту және мәдени-продюсерлік орталығының жыраулармен жұмыс секто­рының меңгерушісі Майра Сәр­сенбаева мақала бүгінгі жаһандану жағдайында ұлттың бірегейлігін сақтауда халықтың ғасырлар бойы жинақталған бай тарихын танып, әрі ашыл­маған қырларын зерттеуге шақыратынын айтты.

– Қазақта «Сырдың елі – жырдың елі» деген алты Алашқа белгілі әдемі сөз бар. Сырдың бойында біздің абыздарымыз бен сүлейлеріміз салып кеткен ұрпақтан ұрпаққа аманатталатын сара жолы жатыр. Елбасының «Болашаққа бағдар: рухани жаңғыру» бағ­дарламалық мақаласы аясында қанша ауқымды шаралар атқарылды. Соның ішінде Қорқыт ата мұ­раларын ЮНЕСКО тізіміне ен­гізу барысында облыстың жеті ауданында бірдей қобыз үйір­мелерін ашу жұмыстарын жүргіздік.

Елбасының «Ұлы даланың жеті қыры» мақаласы ая­сын­да облыстық халық шы­ғармашылығын дамыту және мәдени-продюсерлік орталығы 219 жыршы-жыраудың өмірі мен шығармашылығы енгізілген үлкен жинақ шығармақшы. Ай­мақта қолымызға тимеген мұра әлі де жетерлік. Солардың көшірмесін алып, музыкалық антология шығаруды да жос­парлап отырмыз, – деді Майра Алшынбекқызы.