Жаңа номер

Сыр бойы

syrboyi@yandex.kz

+7 (7242) 40-02-17

Ел қазынасына үнем, бизнеске мүмкіндік

Ел экономикасы үшін тиімді тетік саналған мемлекеттік-жекеменшік әріптестіктің нәтижесі сезілуде. Әсіресе, соңғы жылдары ел құлағына сіңісті болған билік пен бизнес арасындағы қарым-қатынастың жаңа белесі талай ауыл-аймақтағы жоқтың орнын толтырғаны рас.

Облыс орталығындағы «Тарлан» спорттық-сауықтыру кешені, 400 келушіге арналған емхана, Сырдария ауданына қарасты Ақжарма ауылындағы дәрігерлік амбулатория, Жалағаш ауданы Таң ауылдық округінде 90 орынға арналған балабақша, жақында ғана пайдалануға берілген Жаңақорған ауданы Сүттіқұдық ауылындағы спорттық-сауықтыру кешені секілді тізбектесек жалғасып кете беретін осындай игілікті істер мемлекеттік-жекеменшік әріптестіктің айқын нәтижесі.

Мамандар пікіріне сүйенсек, бұл дамыған мемлекеттер тәжірибесінде бар. Тиімділігі, мемлекет өзіне жүктелген міндеттерді жүзеге асырады және инфрақұрылымдық жүйелерді дамытуды жылдамдатады. Бұл орайда жергілікті бюджетке түсетін ауыртпалық айтарлықтай жеңілдейді. Тағы бір айта кетерлігі, озық технологиялар мен тәсілдерді пайдалана отырып, қоғамның әлеуметтік қажеттіліктерін қанағаттандыра алады. Жұмыссыздық мәселесін шешуде де тиімді екенін ескерген жөн.

Ал, инвестор өзінің орындаған жұмысы, салған объектісі және көрсеткен қызметтік шығындары мен белгілі бір деңгейдегі пайданы МЖӘ шартының талаптарына сәйкес өтей алады және оған мемлекет кепіл беретіндігі. Атап айтарлығы, бизнес мемлекетпен ұзақ мерзімді, тұрақты шарт жасай отырып, болашаққа жоспар жасай алады.

Күз басында облыста Парламент Сенатының Әлеуметтік-мәдени даму және ғылым комитетінің көшпелі отырысы өтті. Сонда отырыс жұмысын қорытындылаған комитет төрайымы Б.Әйтімова: «Мемлекеттік-жекеменшік әріптестік шеңберінде салынған бірқатар балабақша, нысандардың жұмысымен таныстық. Әріптестерімізбен бірге Қызылорда облысындағы бұл тәжірибені үздік үлгі ретінде республика бойынша енгізу керек» дегенді алға тартқан еді.

Аймақ басшысы бұл ретте «Мемлекеттік-жекеменшік әріптестік механизмін нақты инвесторлар қызығушылық танытқан жобалардың инвестициялық тартымдылығын арттыру үшін ғана пайдалану керек. Өйткені жобаларды іске асыру инвестор үшін кіріс деңгейін қамтамасыз етіп ғана қоймай, мемлекет тарапынан оларға өтемақы мөлшерін барынша азайтуға, қажетсіз шығындарды жоюға мүмкіндік береді» деген еді.

Облыстық экономика және бюджетті жоспарлау басқармасының мәліметі бойынша, өңірімізде экономиканың барлық салаларында 75 мемлекеттік-жекеменшік жоба жүзеге асу барысында. Оның ішінде денсаулық сақтау саласында – 30, денешынықтыру және спорт саласында – 12, тұрғын үй-коммуналдық шаруашылығында – 10, білім саласында – 7, цифрландыру бойынша – 6, жолаушылар көлігі және автомобиль жолдары саласында – 5, мәдениетте – 2, әлеуметтік қамсыздандыру, қоғамдық тәртіп және экология салаларында 1 жобадан бар.

Бүгінгі таңда 25 жоба, атап айтқанда: 12 дәрігерлік амбулатория, 4 денешынықтыру-сауықтыру кешені, облыс орталығында 400 келушіге арналған емхана, Жалағаш ауданы Таң ауылдық округіндегі балабақша, Қазалы ауданы Әйтеке би кентінде инклюзивті балабақша, арнаулы әлеуметтік қызметтерді көрсететін шағын үй, облыс орталығындағы №101 мектептің бу қазандығын қайта жаңғырту, облыс мектептерін компьютерлендіру, биыл облыстық медицина орталығы мен Қазалы аудандық ауруханасында ангиограф орнату, Шиелі ауданындағы индустриалдық аймаққа электр желісін тарту жобалары бойынша мемлекеттік-жекеменшік әріптестік келісім-шартына қол қойылған.

Ел игілігіне пайдалануға берілген жобалар аз емес. Мәселен, спорт саласы бойынша облыс орталығындағы «Тарлан» спорттық-сауықтыру кешенінде 350 бала спорттың үш түрімен шыныға алады. Жақында Жаңақорған ауданы, Сүттіқұдық ауылдық округінде 150 орындық спорттық-сауықтыру кешені және Шиелі ауданы Гигант ауылында да дәл осындай нысан пайдалануға берілді. Атап айтарлығы, екі жыл ішінде өңірде 16 спорт ғимараты іске қосылса, соның 9-ы мемлекеттік-жекеменшік әріптестік негізінде салынды.

Денсаулық саласы бойынша облыс орталығында бір мезгілде 400 келушіге арналған емхана, Сырдария ауданы Ақжарма елді мекенінде дәрігерлік амбулатория пайдалануға берілсе, Арал ауданының Бекбауыл, Қазалының Өркендеу елді мекенінде дәрігерлік амбулаторияны жыл соңына дейін пайдалануға беру жоспарланған.

Мемлекеттік-жекеменшік әріптестіктің денсаулық саласы үшін тағы бір жаңалығы – облыстық медициналық орталықта және Қазалы аудандық орталық ауруханасында ангиографиялық зертхана құру туралы келісім шартқа қол қойылғандығы. «Ангиографиялық зертханалардың құрылуымен қатар, алғаш рет аудандық аурухана деңгейінде эндоваскулярлық хирургия енгізіледі, бұл жоғары технологиялық медициналық қызметтерді қолжетімді етуге мүмкіндік береді» деген болатын облыстық денсаулық сақтау басқармасының басшысы А.Әлназарова. Жалпы, мемлекеттік-жекеменшік әріптестік бойынша 75 жобаның 30-ы, яғни 40 пайызы денсаулық саласының еншісінде.

Білім беру саласы бойынша 2013 жылдан бастап аталған әріптестік негізінде жұмыс істейтін балабақшалар саны 2 есеге артып, 71 пайызды құрады.

Ал, 9 мемлекеттік-жекеменшік әріптестік жоба бойынша жеке әріптесті айқындау мақсатында конкурс жұмыстары жүргізілуде. Бұл – Арал ауданында әлеуметтік нысандарды газдандыру бойынша 2 жоба, көшелерді күтіп ұстау, ағымдағы жөндеу бойынша 3 жоба, Ақсай полиция бөлімінің құрылысы, «Қызылорда су жүйесін» сенімді басқаруға беру, облыстық медицина орталығында интеграцияланған операциялық жүйені орнату, облыс орталығында 200 орындық жатақханасы бар 600 орынға арналған колледждің құрылыс жобалары.

Мұнан бөлек, 41 жоба бойынша құжат дайындау жұмыстары жүргізілуде.

Гүлмира ДІЛДӘБЕКОВА.

НЕГІЗГІ ЖАҢАЛЫҚТАР 27 қараша 2018 г. 509 0