Сыр бойы

Елімізде шағын және орта кәсіпкерлікті қолдауға мемлекет тарапынан жасалып жатқан мүмкіндік көп. Кәсіпкерлер осы қамқорлықтың арқасында табысқа жетуде. Солардың бірі – Сырдария ауданы,  Асқар Тоқмағанбетов ауылының тұрғыны Нұрсұлу Ажарова.

Ол он жылдан аса   ісмерлік өнерімен айналысып келеді.  Бастапқыда қабілетін кәсіпке айналдыру үшін  «Ақниет» бағдарламасына қатысты. Жобасы қолдау тауып, 300 мың теңге грант жеңіп алды. Онысына тігін машинасы мен құрал-жабдықтарын жаңартты. Ізденімпаз тігінші «Бизнес-кеңесші» сабағына қатысып, біліктілігін арттырды.  Бұған дейін үй ішінде азын-аулақ тапсырыс алып келген ісмер шаруасын едәуір ұлғайтты. Жеке цех ашты. Бүгінде Нұрсұлудың қолынан шыққан бұйымдар үлкен сұранысқа ие. Қыз жасауынан  бастап, құрақ құрау, ұлттық киімдер мен көйлектер, бесік жасауларын тігу шебердің шынайы еңбегі. 

Нұрсұлу бір жағынан мектепте сурет пәнінің мұғалімі. Бейнелеу өнерін жетік меңгерген ол тігіншілікті қатар ұштастырып, кәсібін жандардырып отыр.  Аптасына кемі 2 қыздың жасауын дайындайды. Одан бөлек, қаншама тапсырысы бар.  Тұтынушыларынан тек алғыс алған шебер енді балалар мен үлкендерге арналған байпақ, мойынорағыш пен бас киім тікпек. Онысын соңғы үлгідегі 3D бедерлі пішіндермен көмкеруді  меңгерген.

– Бастысы, еңбектену керек. Алдымен құрал-жаб­дықтар алып, цех аштым. Кәсіпкерлерге арналған мүм­кіндікті пайдаландым. Нәти­жесінде жұмысым алға басты, – дейді ол. 

Кәсіпкер 2 адамды тұ­рақты жұмыспен қамтып отыр. Ондағы қыздар да тігін өнерінің қыр-сырына қаныққан. Нағыз өз ісінің шеберлері. Тігінші үнемі заман талабына сай жұмысын жетілдіруді ойлайды. Осы мақ­сатта облыс орталығында өтетін қолөнер шеберлерінің, кәсіпкерлердің түрлі шараларына қатысып, өзі секілді жандармен тәжірибе алмасып, шеберлігін шыңдауда. Кәсібін кеңейту үшін жақында Өңірлік инвестициялық ор­та­лықтан 3 млн теңге қар­жыға қол жеткізді.  Алған қар­жы­сына  ескі мақтаны қай­та түтіп, жаңартатын және көрпе көктейтін станок әкел­ді. Нәтижесінде жұмысы жеңілдеп, тапсырыс уақыты қысқарды. Жарамсыз деген көрпе-көрпешені қайта қал­пына келтіруге мүмкіндік алды.

Мемлекеттік бағдарлама арқылы кәсібін дөңгеленткен тігінші алдағы уақытта шеберлер санын көбейтіп, тапсырыс түрін кеңейтпек. Сонымен қатар тұрғындарға қолжетімді болу үшін аудан орталығынан үлкен тігін цехын ашу жоспарында бар.

Сара АДАЙБАЕВА.