Сыр бойы

Жуырда Алматы қаласынан осы аттас анықтамалық-энциклопедия жарық көрді. Оған тәуелсіздік алған күннен бүгінге дейінгі егемен Қазақстанның қалыптасуына үлес қосқан қайраткер тұлғалардың ғұмырнамалық келбеті топтастырылыпты. Энциклопедияда елім деген азаматтардың қоғамды алға қозғап, ғасырға бергісіз 25 жылда мемлекетіміздің нығаюы жолында жасаған еңбектері нақты деректермен көрсетілген.

Энциклопедияда Елбасы Нұрсұлтан ­Назарбаев, Бақытжан Сағынтаев, Гүлшара Әбдіқалықова, Қасым-Жомарт Тоқаев, Сағадат Нұрмағамбетов, басқа да қоғам және мемлекет қайраткерлері қатарында біздің  жерлестеріміз – облыс әкімі Қырымбек Көшербаев, Еңбек ері Абзал Ералиев, Жеңіс Қашақбайұлы Пірімов, Самұрат Имандосов, Махмұт Нәлібаев, Асқар Жұмаділдаев, Нұртөре Жүсіптің есімдерінің аталуы – Сыр өңірі үшін мақтаныш.

Энциклопедияның алғысөзін ҚР Мәдениет және спорт министрі Арыс­танбек Мұхамедиұлы жазған. Ол өз заманының қаһармандарын танып, келешек ұрпақ сол кейіпкерлерге елік­теп өссе, патриоттық тәрбиеден ұтыл­майтынымызды, Елбасы Н.Ә.Назарбаев жастардың үлгі алуына, заманауи Қазақстанның келбетін танытуға мүм­кіндік беретін «100 жаңа есім» жобасын осы мақсатта ұсынғанын атап көрсетеді.

Энциклопедия көркем безендірілген. Авторлар оның бірінші серия екенін, келесі сериясы алдағы уақытта жарық көретінін жеткізеді.