Жаңа номер

Сыр бойы

syrboyi@yandex.kz

+7 (7242) 40-02-17

ШЫРАЙЛЫ ӨҢІРДЕГІ ТОЙ ШАПАҒЫ

Өткен сенбі, жексенбіде «Алтын күз» мерекесі аясында Шиелі ауданының құрылғанына 90 жыл толуына арналған шаралар кең ауқымда аталып өтті. Оған әр ауылдан келген өкілдер, мекеме мен кәсіпорын қызметкерлері және де есімі елге белгілі қайраткерлер қатысып, той тартуына куә болды.

Ауданның орталық стадионына ақ боз үйлер тігіліп, той өзінің сән-салтанатымен бастау алды. Ауылшаруашылық өнімдерінің жәрмеңкесі таң бозынан қызып жатты. Аудан орталығының тұрғындары әр ауылдан келген шаруалардың көлігінен өзіне қажетті өнімдерді күнделікті базар бағасынан 15-20 процентке арзан саудалап, қуанышқа бөленсе, шаруалар да ала жаздай еткен еңбегінің жанғанына мерейленді. Облыс әкімінің орынбасары Серік Қожаниязов аудан жұртшылығына лебіз арнап, аймақ басшысының құттықтауын жеткізді. Сондай-ақ, шара барысында мемлекеттік сыйлықтың иегері, жазушы Әнес Сарай, қоғам қайраткері Әбдіжәлел Бәкір көпшілікке өздерінің тілектерін арнады. Аудан әкімі Әшім Оразбекұлы өз баяндамасында биылғы жылғы жетістіктермен қатар 90 жылдық тарихы бар ауданның тәуелсіздік жылдарындағы басты оқиғаларына тоқталып өтті. Осы уақыт аралығында бұрын тек ауылшаруашылық саласымен шұғылданатын аудан өнеркәсіп барысында да жаңа жетістіктерге қол жеткізе бастаған. Тау қойнауының бағалы кені ел игілігіне айнала бастағандығы соның белгісі. Сонымен бірге Елбасы тапсырмасына орай, кәсіпкерліктің өрісі кеңейіп, отбасылық бизнестік тиімділігі жан-жақты көрініс тауып келеді.

Орталық стадиондағы театрланған көріністе шежірелі Шиелінің тарихынан да сыр шертілді, онда өңірдің өркендеуіне үлес қосқан азаматтардың бейнелері сомдалды. Сонан соң озат еңбек ұжымдары мен еңбек адамдары бағалы сыйлықтармен марапатталды.

Түстен кейін Салтанат сарайында ғылыми-танымдық конференция өткізіліп, ауданның 90 жылдық тарихын қамтитын «Шежірелі Шиелі» кітабының тұсаукесері өткізілді. Журналист Ақайдар Ысымов жетекшілік еткен редколлегия мүшелерінің танымдық-тарихи туындыны мазмұнды әзірлегеніне жұртшылық ризашылық білдірді.

Алтын күз мерекесі барысында ауданның бірқатар ауылдық округтерінде әлеуметтік нысандар пайдалануға берілді. Олардың қатарында Бидайкөл ауылдық округіндегі «Бастау» денешынықтыру-сауықтыру кешенін айтуға болады. Аталған ғимарат кәсіпкер Ғалым Ерекеевтің қаржысымен бой көтеріп, жастарымыздың су спортымен шұғылдануына зор мүмкіндік туғызып отырғандығын айтқан жөн. Сондай-ақ, Ыбырай Жақаев ауылындағы №149 орта мектепке ардагер ұстаз, майдангер Әлиакбар Монтаевтың есімі беріліп, ғылыми конференция өткізілді.

Тойға жиналған көпшілік айтыс ақындарының сайысына назар аударысты. «Асылдар туған, шежіре тұнған – Шиелі» деп аталған жыр сайысында Алаш ардақтысы Мұстафа Шоқай, жыр дүлдүлі Нартай Бекежанов, дала академигі Ыбырай Жақаев бастаған алыптардың ел үшін еткен еңбегі терең мәнде айтылды. Айтысқа қатысқан 5 жұп ақын сөзбен маржан төгіп, жұртшылықтың көңілін өсірді.

Кешке мәдениет саласы майталмандарының қатысуымен концерт берілді.

Нұрмахан ЕЛТАЙ,

Шиелі ауданы.

НЕГІЗГІ ЖАҢАЛЫҚТАР 16 қазан 2018 г. 705 0