Сыр бойы

Қармақшы ауданына қарасты Дүр Оңғар ауылында  білікті маман Орынбасар Төлепов басшылық жасайтын «Жаңажол» жауапкершілігі шектеулі серіктестігі – Сыр өңірінде күріш дақылын өндіруде көшбасшы шаруашылықтардың бірі.

Жыл сайын шаруашылық жоғары сортты күріш өндіріп, ел әлеуетін арттыруға сүбелі үлес қосып келе жатыр. Биылғы жылы да бұл ұжым 3200 гектар күріштік алқаптан мол өнім жинауға жаппай жұмылып, шешуші науқанға кірісіп кетті.

– Шаруашылық үш жыл 3200 гектар алқапқа күріш егіп, оның әр гектарынан 60 центнердің үстінде өнім алды. Биыл да  ұжымның диқаншы қауымы осындай көрсеткішке, тіпті одан жоғары өнім алуға күш салуда. Оған мүмкіндігіміз жеткілікті, – дейді шаруашылық басшысының орынбасары, аудандық мәслихат депутаты Төлеу Ерәлиев.

Бүгінде ұжымда 350 адам еңбек етіп жатса, жақын арада қырман жұмысына  ақылы негізде тағы да жұмысшылар қабылданады екен. Егін жинау науқанына немістің 10 дана  «Класс» комбайны, 5 «МагДон» және 10 «Енисей» жаткасы, ал егіс алқабынан қырманға күрішті тасымалдауға 33 түрлі тасымал көлігі қатысуда. Осы жылы шаруашылық күріш дақылынан басқа 10 гектарға бидай егіп, жақсы өнім алса, 1150 гектар ескі және жаңа жоңышқадан  20 тонна тұқым құйған. 150 мың дана жоңышқа тайын басып, ауыл  және аудан тұрғындарына  нарық бағасынан төмен сатқан шаруашылық егілген картоптан да берекелі өнім жинаймыз деп отыр. Ал, 2 гектарға егілген қызанақ пен қиярдан да 7 тоннадан астам өнім жиналыпты. Тағы бір айта кетерлігі, өткен жылы егілген алма ағаштары түгел көктеп, күтімге алынып отыр.

Шаруашылықтағы №4 егіс бригадасын басқаратын Данияр Нұрмағамбетов:

– Өзім басқаратын бригадада 42 диқан-механизатор және басқа да еңбекшілер бар. 250 гектар жоңышқа, 50 гектар бидайдан жоғары өнім алдық. Бригада диқандары биыл 680 гектар күріштен өткен жылғыдай өнім алды, тіпті былтыр әр гектарына 85 центнерден өнім жинаған Нұраддин Бекенов сол жетістікті жаңартуға ынталы. Сушыларымыздың алды 79,2 центнерден өнім жинауда. Әділбек Жаниязов, Анарбек Шарапатов, Ербол Нәбиев, Жүніс Демесінов, Айдос Сәркенов, Азамат Алмағамбетов сынды азаматтарымыз өзгелерге үлгі көрсетуде, – дейді.

Нұрбай ЖАНӘДІЛОВ. 

Қармақшы ауданы.