Сыр бойы

Күзді береке мен молшылықтың бастауы деп жатамыз. Әсіресе ала жаздай төккен терінің өтеуін осы шақта  саралайтын диқан қауымына бұл мезгілдің әр сәті құнды. Олар табиғаттың ашық-жарқын қабағын ұтырлы пайдаланып, жайқалтып еккен өнімін жинап алуға тырысады. Бейсенбі күні Қазалы ауданы бойынша егінге орақ түсті. Қашанда игі талаптың басында көпшіліктің басын қосып, алқалы кеңес өткізетін үрдіс бұл жолы да жалғасын тапты.

Алғаш күрішке орақ салған Қожабақы ауылындағы «Агро-өркен» ЖШС егіс алқа­бында Қазалы ауданы әкімі Мұрат Ергеш­баевтың қатысуымен дәстүрлі «Дала күні» семинар-кеңесі болып өтті. Шараға “РЗА” АҚ президенті, облыстық қоғамдық кеңес төрағасы Самұрат Имандосов, “Нұр Отан” партиясы Қазалы ауданы филиалы төрағасының бірінші орынбасары Қ.Мәмбетжан, аудандық мәслихаттың  хатшысы Күнтілес Назымбеков пен ауылдық округ әкімдері, еңбек ардагерлері қатысты.   

Семинарға қатысушылар ең алдымен Жанқожа батыр кесенесіне барып, баба рухына құран бағыштады. Мұнан соң егіс алқабында пленарлық мәжіліс өткізілді. Аудан әкімі Мұрат Ергешбаев диқандарға ақ жол тілеп, егін орағының лентасын қиды.

Биыл ауданда 17 790 гектар жерге дәнді дақыл егілген. Оның 6800 гектары күріш. Бұл өткен жылмен салыстырғанда негізгі дақыл 435 гектарға артық деген сөз.

Аудан бойынша егін орағы қазан айының 10 жұлдызына аяқталады деп жоспарланып отыр. Келер жылдың жайын бүгіннен бастап қамдаған мамандар көктемгі егіске қажетті минералдық тыңайтқыштармен қамтамасыз ету үшін шаруашылықтар арасынан операторды белгілеуді бастап кетті. 

Қазалы ауданы.