Сыр бойы

Қазақстан Республикасының Конс­титуциясында: «Жергілікті мемлекеттік басқаруды тиісті аумақтағы істің жай-күйіне жауапты жергілікті өкілді және атқарушы органдар жүзеге асырады», – де­лінген. Осы тұрғыда облыс әкімі Қырымбек Көшербаев барлық уақытта да депутаттарға қолдау көрсетіп, олардың ұсыныс-пікірлерін ескеріп, арнайы іс-шаралар қабылдап, сессия жұмыстарына үздіксіз қатысып келе жатқанын айта кеткен орынды болар.

Қалыптасқан дәстүрге сәйкес, жыл басындағы облыс әкімі мен депутат­тар­дың кездесуінде депутаттардан ше­ші­мін күткен мәселелерге орай 35 тақы­рыпта 133 сауал көтерілді, оның қар­жысы 13 621,6 млн теңгені құрады. Осы айдың басына дейін аталған сауалдар арасында 16 мәселе оң шешімін тапты. Қалғандары облыс әкімінің іс-қимыл жоспарына енгізілген.

Облыс әкімінің өңірімізді бірлесе өркендету аясындағы көзқарастары мен бастамалары елдің ортақ игілігіне ай­налуда. Аймақ басшысының бастамасы тұрғындар тарапынан қолдау табуда. Қызылорда қа­ла­сында тазалықтың қалыптасуы – осы­ның бір ғана дәлелі.

Санамызда орныққан жаңарған жол­дар мен инфрақұрылымдар, халық игі­лігіне беріліп жатқан әлеуметтік нысандар, жаңа жұмыс орындары, әлеуметтік топтарға жасалып жатқан қолдаулар, ұлтымыздың рухын жаңғырту бағытын­дағы көшелі істер біздің іс-әрекетімізге, сенімімізге қатты ықпал ете бастады. Мысалы, биылғы жылды «Жаппай кәсіпкерлікті қолдау жылы» деп жария­лаудың әлеуметтік маңызын алайық.  Кә­сіпкерлік еркіндікке, жетістікке бас­тайтын жол. Ал кәсіпкер – өзгелер үшін қайшылықтар мен түсініксіз жайттардан мүмкіндік тани білетін, таба білетін адам.

Биыл шілде айының басында Қы­зылорда облысы Астанаға зымы­ран­дық-ғарыштық техниканың ашық аспан астындағы музейін тарту етті. Елбасы музейге «Қазақстанның ғарыш саласын­да жетекші мемлекеттердің бірі екенін айқындайтын тамаша тарту болды» деген баға берді. Бұл да өз кезе­гінде қоғамдық санамыздың одан әрі серпілісіне  бастайды, ортақ жетістіктерге басымызды біріктіре түседі.

Облысымыздағы осындай ортақ жағымды жаңалықтар жұртшылық тарапынан позитивті ойлауды күшейткені қуантады.

Наурызбай БАЙҚАДАМОВ,

облыстық мәслихат хатшысы.