Сыр бойы

«Астана ЭКСПО-2017» ҰК» АҚ Басқарма Төрағасы Ербол Шорманов Жапонияның Қазақстан Республикасындағы Төтенше және Өкілетті Елшісі Итиро Кавабатамен кездесу өткізді, деп хабарлайды Baq.kz ақпарат агенттігі «Астана ЭКСПО-2017» ҰК» АҚ Қоғаммен байланыс департаментіне сілтеме жасап.

Басқарма Төрағасы мәртебелі мейманға көрме аяқталған соң, Ұлттық компанияға міндеттелген бірқатар жұмыс жөнінде айтып берді. Сондай-ақ, Е.Шорманов 2017 жылғы қарашаның 10-ынан бастап «Нұр Әлем» Ұлттық павильоны, Үздік тәжірибелер аймағы, Энергия холы және Конгресс орталығының келушілер үшін қайта іске қосылғанына да тоқталды. Кездесу барысында «Астана» Халықаралық қаржы орталығы, «Astana Hub» ІТ-стартаптарының халықаралық технопаркі, Жасыл технологиялар орталығы және өзге де ұйымдар жайғасатын нысандарда қайта жөндеу жұмыстары жүргізіліп жатқаны баяндалды.

Ербол Шорманов Жапонияның «Астана ЭКСПО-2017» көрмесіне қатысқаны үшін Итиро Кавабатаға алғысын білдірді.

«Жапония көрмеге қатысатынын алғашқы болып растаған мемлекеттердің қатарында. Көрме кезінде Күншығыс елінің павильоны ең көп тамашаланған «Үздік 10» павильон (700 мың адам тамашалаған) қатарынан орын алды. ЭКСПО-2017 барысында, көрмеге келушілер жапон халқының мәдениетімен және дәстүрімен етене танысып, жарықдиоды, балдыр биомассасы және сутекті энергетика саласындағы соңғы технологияларын тамашалады. Ең бастысы, екі елдің бизнес өкілдері өзара байланыс орнатты»,– деді Шорманов.

Өз кезегінде Жапония елшісі ЭКСПО-2017 көрмесінің ұйымдастырылу деңгейіне жоғары баға берді.

«ЭКСПО-2017 Халықаралық мамандандырылған көрмесінің өткізілуі екі ел арасындағы достық қарым-қатынастың нығаюына сеп болғанын үлкен сеніммен айта аламын», - деді Кавабата.

Сондай-ақ, Кавабата мырза Жапонияның Осако қаласында ЭКСПО-2025 Бүкіләлемдік көрмесін өткізу құқығына ие болуы бағытындағы жұмыстарды ілгерілетуде екенін тілге тиек етті.

Кездесу соңында Ербол Шорманов Итиро Кавабата мырзаға бөлген уақыты үшін алғыс айтып, Жапония тарапының жоғары технологиялар мен жасыл энергетика саласында алдағы уақытта да бірлесіп жұмыс атқаратынына сенім білдірді.