Сыр бойы

Қызылорда қаласындағы «Жылы жүрек» ерікті жастардың ұйымдастыруымен 2018 жылдың 20 қаңтары күні  балаларды оңалту орталығында қайырымдылық шарасы  өтеді деп күтілуде.

Шара мақсаты - ерікті жастар кішкене бүлдіршіндерді  тек 1 маусым күні ғана емес, кез-келген уақытта, жағдайда  қуантып, үнемі пайдалы көмек беруді, қоғамды соған дағдылануға шақыру.

«Art chaos» шарасында балалар құм мен суға «Эбру» әдісімен сурет салып, қына және аквагриммен сәнденеді. Бейнелеу өнерінің осындай ерекше әрі жаңаша бастауын оңалту орталығындағы балалар тұңғыш рет көргелі отыр.

Сондай – ақ, «Жылы жүрек» ерікті жастардың мәлімдеуінше осы өнерге баулу балалардың болашаққа талпынысын, ұсатанатын бағдарын, ізгілікке ұмтылысын арттырады. Өйткені, суға сурет салу (эбру) өнері ішкі жан дүниеге терең бойлап, тың нәрсені ойлап табуға, шығармашылықты дамытуға  мүмкіндік береді. Ал, құммен сурет салу (sand art) әр баланың сезу, қиялдау қабілетіне әсер етіп, балалардың қолдарын жұмыс жасауға икемдейді.

Шара барысында сурет салудан бөлек баланың ойлау қабілетін арттыратын логикалық ойындар ойнатылады. Мүмкіндігі шектеулі балаларына қамқор болып жүрген ата-аналармен де жұмыс жасалады. Олар үшін психолог маман тренинг өткізіп, баламен жұмыс жасау үшін білуге міндетті қағидаларды үйретеді.

Шара барысында қатысушыларға көтеріңкі көңіл күй сыйлау мақсатында әсем әннен шашу шашылып, ұйымдастырушылар «Жылы жүрек» ерікті жастар тарапынан  балаларға тәтті таратылады.

Мұқтаж жандарға шынайы көңілмен мереке сыйлағысы келген жастар қауымы алдағы уақытта да әр түрлі бағыттағы қайырымдылық шараларды ұйымдастыруды жоспарлап отыр.

Жаңадан құрылса да алға қойған мақсаттары айқын, сенімдері нық екенін осы шара арқылы дәлелдемек.