Сыр бойы

Өткен аптада «Саламат Агро» ЖШС-да «Бай­қоңыр» Әлеуметтік-кәсіпкерлік кор­пора­циясы ҰК» АҚ директорлар кеңесінің көшпелі отырысы өтті.

Жиынға облыс әкімі Қ.Көшербаев төрағалық етті. Отырыс барысында «Байқоңыр» Әлеуметтік-кәсіпкерлік корпорациясы ҰК» АҚ басқарма төрағасы Т.Кенжебаев бірқатар мәселелерге тоқталды.

Басқарма төрағасы назар аударған мәселелердің қатарында «Қызылорда автобус паркі» және «Алтын қамба» ЖШС-лар бар. Бұл серіктестіктер Әлеуметтік-кәсіпкерлік корпорацияның еншілес компаниялары болып табылады. Бұдан бөлек, «Қызылорда қаржы компаниясы» ЖШС және «АгроХолдинг Байконур» ЖШС сынды еншілес компаниялардың да бар екенін айта кеткен жөн.

«Байқоңыр» ӘКК» ҰК» АҚ негізгі қызметтерінің бірі мемлекеттік және жеке серіктестіктің негізінде аймақ өркендеуіне ықпал ету болып табылады. Қазіргі таңда корпорацияның қызметі жеке қәсіпкерліктің дамуына барынша қолайлы жағдай тудыруға бағытталған. Атқарылып жатқан жұмыстар аз емес. Соның бірі ретінде автобус паркін атап өтуге болады.

Биыл қоғамдық көліктің қолжетімділігін арттыру, халық­қа көрсететін қызметтің сапасын бұрынғыдан да жақсарта түсу үшін  жаңа автобус паркі пайдалануға берілді. Онда қала көлемінде қызмет көрсететін үлкен сыйымдылықтағы автобустарға арналған тұрақтар, жанармай бекеті, көлік жуу алаңы және автобустардың үздіксіз жұмыс жасауына жағдай жасайтын түрлі мүмкіндіктер қарастырылған. Автобус паркінде көлікке қажеттінің барлығы бар. Ол 5 гектар аумақты алып жатыр. Жаңа парк 200 автобусқа шақталған. Бүгінде оның жұмысы жанданып келеді.

Көшпелі жиында «Шаған агрофуд», «Арал Нұрлы жер» серіктестіктері әңгіме арқауына айналып, Үй-құрылыс комбинатын жандандыру жайы да қозғалды.  Одан бөлек шетелдік компанияларға қатысты мәселелер мен ішкі аудит жұмыстары сөз болды.