Сыр бойы

«Туған жерге тағзым» форумы аясында телекөпір арқылы облыстағы бірқатар жаңа кәсіпорындар іске қосылды. Солардың бірі, Қызылорда қаласындағы 1000 бас ірі қара малға арналған «Саламат - Агро» ЖШС-нің мал бордақылау және сою бекеті жұмысын бастады.

Қазірде бордақылау алаңында қазақтың ақбас сиыры, герефорд, голштин тұқымды сиырлары бордақылануда.

Бордақылау алаңына алғашқыда 6-8 айлық 500 ірі қара мал келіп түседі. Бордақылау мерзімі 100 күнге дейін созылады. Мал сою кешеніндегі 1 бас малдың тірілей салмағы 400-420 кг болады.

Өндіріс технологиясы «бос-толық» жүйесі негізінде ірі қара малды байламай ұстауды қарастырады. Алаңға келіп түскен мал 7 күн карантинде болып, 6-7 айлық бұқашықтар тәулігіне кемінде 0,75-0,8 кг салмақ қосып, 10-12 айға дейін өсіріледі. 10-12 айлық жас мал 16-18 айға дейін тәулігіне 1 келіге жуық ет алып интенсивті бордақылауға көшеді.

Айта кетсек, мал сою бекеті HALAL сертификатын алған.