Сыр бойы

Облыс әкімі­нің орынбасары Руслан Рүстемов «Болашаққа бағ­дар: рухани жаңғыру» бағ­дар­ламасы аясында өткен «Қа­зақстанның 100 жаңа есі­мі» жобасының жеңімпазы Сымбат Әбдірахмановамен жүздесті.

Шарада алдымен облыс әкі­мінің орынбасары Руслан Рүс­темов «Қазақстанның 100 жаңа есімі» жобасына енген жерлес­терімізді құттықтап, жылы лебізін білдірді.

– Тәуелсіздік алғаннан кейін еліміздің көркеюіне үлес қосқан, жерлестерімізді көпшілікке таныту мақсатында жалпыхалықтық «100 жаңа есім» жобасы қолға алынған болатын. Аталған жоба бірнеше кезеңнен тұрып, оған еліміздің кез келген үміткеріне қатысуға мүмкіндік берілді. «ЕІ.кz» порталында онлайн-дауыс беру нәтижесінде жобаның жеңім­паздары анықталды. Біздің облыста 7 үміткер дауысқа түсіп, 4-і жеңімпаз атанды. Жобаның жеңімпаздары Елбасымен жүздесіп қайтты. Оның ішінде Сымбат Нұртазақызы да бар. Сымбаттың жеткен жетістігі мен жасаған еңбегі көптеген жастарға үлгі болары анық, -деді Руслан Рүстемов.

Сымбат Әбдірахманова 1988 жылы 10 желтоқсанда Қызылорда қаласында дүниеге келген. Абылай хан атындағы Қазақ Халықаралық қатынастар мен Әлем тілдер университетінде «филология» мамандығын, 2007 жылы Иран мемлекетінің «Таботабои» университетінде арнайы біліктілік арттыру курсында білім алды. Иран Ислам Республикасының Қазақстандағы елшілігінде аудармашы қызметін атқарды. «Ілеспе аудармашы» мамандығы бойынша магистратурада білімін жетілдірді. Қазіргі таңда облыстық білім басқармасы жанындағы облыстық оқу орталығында «Әлеуметтік педагогикалық қызмет» бөлімінің меңгерушісі қызметін атқаруда.

Білікті маман балаларға арналған қазақ тіліндегі дамытушы мультфильмдер құрастырған жас маман. Аудармашы, психолог. Ол парсы тілі бойынша Орта Азиялық олимпиадада 1-орын иегері. «Педа­гогикалық ізденіс» ғылыми-әдіс­темелік журналының редакция ал­қасының мүшесі. Сонымен бірге Сымбат тілінде мүкістігі бар балаларға арналған бірнеше мульт­фильмдердің авторы. Атап айтар болсақ, «Дыбыстарды машық­тан­дыру» , «Көңілді түстер» еңбегі бар.

Жиын соңында Сымбат Нұртазақызы Елбасымен өткен кездесуден алған әсерімен бөлісті. Енді алдағы уақытта үлкен жобалар мен жұмыс күтіп тұрғанын, бұл үшін тынбай еңбек ете беретінін жеткізді. Жеңімпаз жерлесімізге сый-сияпат көрсетілді.

Сара АДАЙБАЕВА.