Сыр бойы

«Еларай» қоғамдық қоры 2015 жылы өз жұмысын бастады. Қордың мақсаты: жалпы қоғамда салауатты өмір салтын қалыптастыруға, әлеуметтік тұрғыдан осал топтарға қолұшын беріп, қолдау көрсету. Бір айта кетерлігі, мұнда атқарылатын  шаралардың басым бөлігі  еріктілер есебінен жүзеге асырылады. Бүгінде қоғамдық  қордың директоры болып қызмет атқаратын Асхат Байдәулетов те осыған дейін еріктілер қатарында болатын. Сондықтан оған бұл жұмыстың жай-жапсары жақсы таныс.

Қоғамдық қордың қазіргі таңдағы тіршілік-тынысын білу мақсатында А.Байдәулетовты әңгімеге тартқан едік:

– Біз алғашқы жұмысымызды бас­таған кезде облыс көлемінде мүмкіндігі шектеулі балалар мен тұрмыс жағдайы ауыр отбасылардың балалары үшін «Ұмытылмас бір күн» атты шара ұйымдастырып, бір күн болса да керемет демалыс сыйлаған едік. Бүгінде де осындай ізгі мақсатта «Біз мектепке барамыз», «Несібе», «Өзгеге өмір сыйла!», «Жанұяға жылу сыйла!» деп аталатын жобалар аясында қайырымдылық шаралары тұ­рақты ұйымдастырылып ке­леді. Айталық, өзгеге өмір сый­лау мақсатында 50 адам ерікті түрде қан тапсырды. Мәселе қаражатта емес, осы­ның өзі талай науқастың өміріне тамшыдай болсын, араша болғаны анық. Ал «Несібе» жобасы бойынша аз қамтылған отбасыларға азық-түлік себеттері үлестіріледі. «Жанұя жанұяға көмектеседі!» жобасының аясында еріктілер есебінен қорға келіп түскен киім-кешек, тұрмыстық бұйымдар қажеттілігіне қарай әлеуметтік қолдауға мұқтаж әр отбасына беріледі,- дейді қор директоры.

Білуімізше, бұл санаттағы отбасылар алдын ала анкета арқылы анықталып, зерттеліп, әлеуметтік картасы толтырылады. Сондай-ақ «Еларай» қоғамдық қорының жанынан арнайы ашылған әлеуметтік дүкен қызмет көрсетеді. Көптеген отбасылар осы жерден қажетті бұйымдарын алып жатады. Өткен жылдары осы жобалар аясында 800-дей отбасына, сонымен бірге, мектепке баратын 80-100 балаға көмек берілген.

Қоғамдық қор директорының ай­туын­ша, қазіргі таңда «Жанұяға жылу сыйла!» жобасы бойынша 60-70 от­басына жылу маусымына байланысты көмір түсіріп беруге жұмыстар жүргізіліп жатыр.

Ғазиза ӘБІЛДА.