Сыр бойы

Бір аптаға созылатын шахматшылар жарысына байланысты бүгін өңірлік коммуникациялар қызметі брифинг ұйымдастырды.

Он екінші жылға жалғасқан республикалық турнир халықаралық гроссмейстер Дәрмен Сәдуақасовтың есімін иеленген. Брифингте Д.Сәдуақасов жарыс шарттарына тоқталды.

– Онда 9, 13, 17 жасқа дейінгілер сынға түседі. Шахмат турнирі щвейцария жүйесі бойынша 9 турдан тұрады. Төрешілер әр жастағы топтан ұлдар мен қыздар арасынан жекелей есепте жеңімпаздарды анықтайды. Команда қатысушыларының жинаған жалпы ұпай санына қарай ең үздік команданы анықтайды, – деді ол.

Турнирді «Дарын» республикалық ғылыми-практикалық орталығы Қазақстан шахмат федерациясының қолдауымен ұйымдастырып отыр. Ол 30 қазан-5 қараша аралығында Қызылорда қаласында өтеді. Турнирге елімізден бөлек, Қырғызстан мен Ресейден 160-тан астам спортшы қатысады. Сол қатардағы жерлестеріміз Әсел Серікбай мен Назерке Нұрғали брифингте БАҚ өкілдерінің сұрақтарына жауап берді.

Облыстық білім басқармасының басшысы Бақытжан Сайлыбаев ақыл-ойды дамытып, зиялылыққа жетелейтін зерделі ойын биылғы оқу жылынан бастап мектеп бағдарламасына енгізілгенін айтты.

– Мектеп жасындағы дарынды шахматшыларды айқындау және дайындау, жоғарғы деңгейде насихаттау мақсатында іріктелген мектептер пилоттық режимде жұмысты бастап кетті, – деді ол.

Н.ҚАЗЫБАЙҚЫЗЫ.