Сыр бойы

Қазалы ауданында даңқты қолбасшы Жалаңтөс батырдың 440 жылдығы аясында бірқатар жаңа нысандар пайдалануға берілді. Елді мекен тұрғындары мен қонақтар ең алдымен ауылдық клубтың ашылу рәсіміне куә болды. Салтанатты рәсімде  «Нұр Отан» партиясы Қызылорда облыстық филиалы төрағасының бірінші орынбасары Ибадулла Құттықожаев, аудан әкімі Нажмадин Шамұратов ауыл тұрғындарының  көптен күткен қуаныштарымен бөлісті.

 Бүгінгі шараға арнайы қатысқан И.Құттықожаев баршаға облыс әкімінің  құттықтауын жеткізіп, клуб ұжымына түрлі түсті теледидар сыйлады. Ал  тұрғындар атынан сөз алған Мемлекеттік сыйлықтың лауреаты Ажаркүл Алдажарова жұртшылықтың  ауылда дәл осындай заманға сай мәдениет үйі болса деген армандары орындалғанын, жаңа клуб  ауыл жастарының бос уақыттарын тиімді өткізулеріне жақсы әсерін тигізетінін, мұның өзі  ауыл халқына  жасалған жағдай екенін жеткізді. Осынау 150 орындық клубта көрермендер залы, үйірме бөлмелері, кітап сақтау бөлмесі, оқырмандар залы бар. Қазіргі таңда клубта 4 үйірме жұмыс жасайды. Жаңа клубтың лентасы қиылғаннан кейін қонақтар ғимарат ішімен танысты. Көрермен залында Жалаңтөс батыр туралы деректі фильмді тамашалаған мектеп оқушыларының бірі  Динара Қайрулла бұған дейін Жалаңтөс батыр туралы деректерді тек кітап беттерінен ғана оқып білгенін, бүгінгі фильмнен  зор әсерге, бөленгенін,  ат үстінде ғұмыр кешіп , туған жерінен жырақта жерленген Жалаңтөс батырдың елімізді қорғаудағы ерлігі туралы жан-жақты мағлұмат алғандарын тебірене айтты.  Ауылдық клубтың ашылуынан кейінгі шара орталық алаңдағы салтанатпен жалғасты. 

Биылғы жылы абаттандырылған орталық алаңмен танысқан қонақтар зор әсерге бөленді. Жаңа алаң ауылдағы ескі клуб, балабақша, шаруашылық қоймасының орнына салынған. Жаңаша кейіпке енген алаңда шағын демалыс орындары, балалардың ойын және спорттық жаттығу құралдары орналастырылған. Ауылды абаттандыруға  өткен жылы аудандық бюджеттен 70,5 млн теңге бөлінген болатын. Театрландырылған көрініспен басталған шарада «Нұр Отан» партиясы Қызылорда облыстық филиалы төрағасының бірінші орынбасары ИбадуллаҚұттықожаев ауыл тұрғындарын баба мерейтойымен құттықтады.

Ауылдық ардагерлер кеңесінің төрағасы Сайын Дәуіт ауылдағы нысандардың бәрі жаңа екендігін, жаңа мектеп, жаңа амбулатория, жаңа балабақшаның қатарына бүгін жаңа клуб қосылғандығын қуанышпен жеткізді. Шара мерекелік концертке   жалғасты. Мұнан соң  қонақтар баба рухына арналған асқа қатысты.

Жұмабек Табынбаев,

Қазалы ауданы.