Сыр бойы

Шығыстық үлгіде жаңғыртылатын Сырдарияның сол жағалауы бүгінде «Жаңа қала» атанып үлгерді. Бұл аймақты кешенді игеру­дің алғашқы кезеңі 2017-2024 жылдар аралығына белгіленген. Десе де, бұл бағыттағы жұмыстар мерзімінен бұрын басталды. Дәлел ретінде өткен жылы пайдалануға берілген Сырдария өзенінің екі жаға­лауын байланыстыратын кө­пір­ді атап өтуге болады.

Қаланың бас жоспарына сәйкес, аталған аймақтың 1500 ­гектарын игеру көзделген. Негізінен, сол жағалаудағы аумақ 15 ауданнан құралады. Атап айтқанда, тұрғындарға арналған 11 аудан, 1 индус­триалдық аймақ және 3 ірі  парк пен бульварлар қарастырылып отыр. 2013 жылы облыстық бюджеттен бөлінген 132,9 млн теңгеге Сырдария өзенінің сол жағалауына инженерлік-геологиялық және гео­дезиялық зерттеу жұмыстары жүргізілді. 2014 жылы осы аумақтың түбегейлі жоспарлау жобасы әзір­ленді.

Бүгінде бұрынғы Қазақ Орталық Атқару комитеті ғимаратының сызбасы бойынша Рухани жаңғыру орталығының құрылысы жүргізіліп жатыр. Онда 1925 жылы этностың аты «Қазақтар» деп ресми аталған тарихи шешім қабылданған болатын. Оның бір жағы мұражай да, екінші жағы Рухани жаңғыру орталығы болады.

Бұған қосымша жаңа қаланың бірінші шағын ауданында 18 көппәтерлік үй, 320 орындық балабақша құрылысы, Жастар ресурстық орталығы, «Болашақ» университетінің ғимараты салынуда. Сондай-ақ, осы жерде салынатын Неке сарайы, 300 төсектік аурухана мен бір ауысымда 100 адамға арналған емхананың жобасы жасалуда.

Осы ретте, жақында ғана «Бола­шақ» университетінің студент­тер қалашығының құрылысы бас­талғанын айта кеткен жөн. Сол жағалауда «Болашақ» уни­верситетінің бүтін бір қалашығы бой көтереді. Атап айтқанда, 12 қабатты әкімшілік ғимарат, оқу корпустары, Студенттер сарайы, клиникалық құралдармен жабдықталған медициналық кол­ледждің және «Болашақ» кол­леджінің ғимараты, балабақша, дендро­саябақ пен мегаорталық орналасатын болады.

А.АҚЫЛБЕКОВ.