Сыр бойы

Облыс әкімі Қырымбек Көшербаев «Қорқыт және Ұлы Дала сазы» атты халықаралық фольклорлық – музыкалық өнер фестиваліне қатысушы қонақтарды қабылдады. Олардың арасында АҚШ-тың Костал Каролина университетінің «Әлем әдебиеті» кафедрасының доценті, этномузыкатанушы Анна Олдфилд, Түркиядағы Хаджеттепе университетінің профессоры Озкул Чобаноглы, музыка ғылымының профессоры, Дәстүрлі музыка жөніндегі халықаралық ұйымның мүшесі, қытайлық Сяо Мей бар екенін айта кеткен жөн.

Кездесу барысында облыс басшысы түркі әлемінің әуені ұлықталатын шараның маңызы жоғары екенін атап өтті.

– Сыр еліне қош келдіңіздер. Алашқа ана атанған мекенде Жанкент, Сығанақ, Қызылорда секілді елдің астанасы болған бірнеше қала бар. Биыл елімізде «ЭКСПО» көрмесі өткізілді. Елбасының тапсырмасымен қайта жаңғырудан өткен «Қорқыт Ата» мемориалдық кешені және «Байқоңыр» ғарыш айлағы бүгінде туристер табан тірейтін орындарға айналды. Сырдария өзенінің сол жағалауындағы құрылыс жұмыстары ерекше қарқынмен жүруде. Аталған аймаққа Қазақ Орталық Атқару комитетінің үлгісіндегі ғимарат салынуда. Оның бір жағы мұражай да, екінші жағы Рухани жаңғыру орталығы болады, – деді аймақ басшысы.

Жиында сөз алған Түркі мәдениеті халықаралық ұйымының Бас хатшысы Дүйсен Қасейінов тарихи маңызы жоғары мәдени шараны өткізіп жатқан облыс басшылығына алғысын білдіріп, Қырымбек Елеуұлына «ТҮРКСОЙ» ұйымының тәуелсіздіктің 25 жылдығына арналған медалін табыстады.

– Бұл фестивальдің Қызылордада – Қорқыт елінде өтуі заңдылық. Сыр халқы бізді қазаққа тән дархан мінезді қонақжайлылықпен күтіп алды. Мұндағы жұрттың салт-дәстүрді берік ұстанатыны көрініп тұр. Халықаралық мәдени шараны ұйымдастырып жатқан облыс басшылығына алғысым шексіз, – деді ол.

Әлем артисі атанған Қазақ Ұлттық өнер университетінің ректоры, профессор, Қазақстанның халық артисі Айман Мұсаходжаева шығармашылық адамдарының арасында рухани байланыс орнату үшін мұндай деңгейі жоғары шаралардың маңызды роль атқаратынын тілге тиек етті. Ал, ресейлік ғалым, өнертану ғылымдарының докторы, профессор Игорь Мациевский Қорқыт бабаның мұралары сияқты әлемде 1500 жыл тоқтаусыз орындалған музыкалық шығарманы табу қиын екенін сөз етті.

Азиз БАТЫРБЕКОВ.